راہول اورپرینکا کو میرٹھ سے واپس لوٹادیاگیا۔ ویڈیو

,

   

میرٹھ۔کانگریس لیڈر ان راہول گاندھی اور پرینکا گاندھی واڈرا کو منگل کے روز اس وقت میرٹھ سے واپس لوٹادیاگیا جب وہ مخالف سی اے اے احتجاج کے متاثرین سے ملاقات کے لئے گئے ہوئے تھے۔

کانگریس لیڈران کاالزام ہے کہ راہول اور پرینکا کو میرٹھ کے مضافات پرتاپور سے واپس لوٹنے پر مجبور کیاگیاہے۔

 

میرٹھ میں جیسے ہی متوفیوں کے پسماندگان سے ملاقات کے لئے راہول او رپرینکا کی دہلی سے روانگی خبر پھیلی اسی کے ساتھ پولیس کی بھاری جمعیت علاقے میں متعین کرادی گئی تھی۔

راہول گاندھی نے رپورٹرس کو بتایا کہ پولیس نے انہیں کوئی احکامات نہیں دیکھائے مگر ان سے واپس جانے کے لئے استفسار ضرور کیا۔

انہوں نے کہاکہ”ہم نے پولیس کو بتایا کہ صرف ہم تین لوگ جائیں گے مگر پولیس راضی نہیں ہوئی“۔

راہول اور پرینکا کے ساتھ سابق رکن پارلیمنٹ پرمود تیواری بھی موجو دتھے۔

سینئر سپریڈنٹ آف پولیس (ایس ایس پی) اجئے سہانی نے کہاکہ مذکورہ کانگریس لیڈران کوامتناعی احکامات پر مشتمل کاپی دیکھائی گئی جس کے بعد وہ ”خود سے ہی واپس لوٹ گئے“ہیں

۔بتایاجارہا ہے کہ کانگریس لیڈر عمران مسعود نے ایک متاثرہ کے گھر والوں سے مذکورہ گاندھیوں کو فون پر بات کرائی ہے۔

مذکورہ ایس ایس پی نے کہاکہ ان لیڈران کا میرٹھ دورہ دفعہ144کی خلا ف ورزی او رکشیدگی کا سبب بنتا۔

واضح رہے کہ اتوار کے روز بھی پرینکا گاندھی نے ضلع بجنور کا دور ہ کرتے ہوئے شہر یت بل کے خلاف احتجاج کے دوران ہلاک ہونے والے دو لوگوں کے فیملی سے ملاقات کی تھی۔

اس کے علاوہ یوپی کانگریس کے صدر اجئے کمار لالو نے کہاکہ پرینکا نے علاقے کی عوام سے بھی بات چیت کی تھی۔

جمعرات کے روز ریاست اترپردیش کے مختلف اضلاعوں میں شہریت ترمیمی ایکٹ کے خلاف بڑے پیمانے پر احتجاجی مظاہرے ہوئے جس میں کم سے کم17لوگوں کی موت ہوئی اورمنقولہ اورغیر منقولہ اثاثوں کا نقصان بھی ہوا ہے