ہرارے ۔زمبابوے کے کرکٹر ریان بْرل کی جانب سے اپنے جوتے کوگلو سے جوڑنے اور اسپانسر نہ ہونے کا شکوہ کیے جانے کے بعد جوتوں کی مشہور کمپنی پوما نے زمبابوے کی کرکٹ ٹیم کے جوتوں کو اسپانسر کرنے کا اعلان کردیا۔اس تمام سلسلے کا آغاز اس وقت ہوا تھا جب زمبابوین کرکٹر ریان بْرل نے ٹوئٹ کی تھی، جس میں لکھا تھا کہ کیا ہمیں جوتوں کے لیے کوئی اسپانسر مل سکتا ہے تاکہ ہمیں ہر سیریز کے بعد اپنے جوتوں کو گلو نہ لگانا پڑے۔یہ پیغام بہت وائرل ہوا اور اس ٹوئٹ کا دنیا کی مشہور جوتوں کی کمپنی اور عالمی شہرت یافتہ برانڈ پوما نے مثبت جواب دیتے ہوئے ناصرف ریان بْرل بلکہ پوری زمبابوین ٹیم کو اسپانسر کرنے کا فیصلہ کیا۔پوما نے کرکٹر کی ٹوئٹ پر انہیں جواب دیا کہ اب آپ کو اپنے جوتوں پر گلو لگانے کی ضرورت نہیں، ہم آپ کو اسپانسر کرتے ہیں۔پوما کی اس ٹوئٹ پر خوشی اور جذبات کے ملے جلے تاثرات سے لبریز زمبابوین کرکٹر نے شکریہ ادا کرتے ہوئے کہا کہ وہ پوما کرکٹ ٹیم کا حصہ بننے کے شدت سے منتظر ہیں۔ پوما نے زمبابوے کی کٹ سے مماثلت رکھنے والے لال اور پیلے رنگ کے جوتے کے جوڑوں کی تصاویر شائع کرتے ہوئے لکھا کہ ریان بْرل اور ان کے ساتھیوں کے لیے خصوصی شپمنٹ، ہمیں امید ہے کہ رنگ ان کی جرسی سے میل کھائے گا۔ریان بْرل نے مزید لکھا کہ میں پوما کرکٹ ٹیم میں شمولیت پر فخر محسوس کرتا ہوں، یہ گزشتہ 24 گھنٹوں کے دوران شائقین کی حمایت اور مدد کی وجہ سے ممکن ہوا اور مداحوں کے ساتھ ساتھ پوما کا بھی شکریہ ادا کیا۔یاد رہے کہ زمبابوے کی ٹیم مالی مشکلات کا شکار ہے۔
