دوحہ۔14 نومبر (سیاست ڈاٹ کام ) سعودی فٹبال آرگنائزیشن کے مطابق سعودی عرب کی قومی فٹبال ٹیم گلف فٹبال کپ 24 میں شریک ہوگی۔ گلف کپ قطر کے دارالحکومت دوحہ میں ہورہا ہے جو 24 نومبر سے 6 دسمبر تک جاری رہے گا۔ تفصیلات کے مطابق سعودی فٹبال آرگنائزیشن نے ٹوئٹر پر اطلاع دی ہے کہ گلف فٹبال آرگنائزیشن نے سعودی فٹبال ٹیم کو ٹورنمنٹ میں شرکت کی دعوت دی تھی جو منظورکرلی گئی ہے۔ الشرق الاوسط کے مطابق گلف فٹبال آرگنائزیشن نے تصدیق کرتے ہوئے کہا کہ سعودی عرب، متحدہ عرب امارات اور بحرین کی قومی فٹبال ٹیمیں قطر میں ہونے والے گلف کپ میں شریک ہوں گی۔ گلف آرگنائزیشن کے عہدیداروں نے دوحہ میں پریس کانفرنس کے دوران یہ اعلان کیا ہے۔ پریس کانفرنس سے قبل آرگنائزیشن کی مجلس عاملہ کا اجلاس ہوا تھا۔ صدارت چیئرمین شیخ حمد بن خلیفہ بن احمد آل ثانی نے کی تھی۔ عہدیداروں نے کہا کہ تینوں ممالک کی قومی ٹیموں نے شرکت کی منظوری دے دی ہے۔ اس سے قبل قطر،کویت، سلطنت عمان، عراق اور یمن گلف کپ میں شرکت کی توثیق کرچکے ہیں۔ تین ہفتے قبل دوحہ میں گلف کپ کی قرعہ اندازی کے وقت تک صرف پانچ ٹیموں کی شرکت کی منظوری سامنے آئی تھی۔ سعودی عرب، امارات اور بحرین کی منظوری کے بعد نئی قرعہ اندازی ہوگی۔ گلف کپ 24 کے مقابلے مقررہ شیڈول کے مطابق 24 نومبر ہی کو شروع ہوں گے۔
