سڈنی، 10جون (یواین آئی) دو بار کی اولمپک میڈلسٹ پی وی سندھو اور نوجوان ہندوستانی کھلاڑی تنوی شرما نے عمدہ کارکردگی کا مظاہرہ کرتے ہوئے آسٹریلین بیڈمنٹن اوپن 2026 ٹورنمنٹ کے ویمنز سنگلز کے دوسرے راؤنڈ (پری کوارٹر فائنل) میں جگہ بنا لی ہے ۔ اولمپک بونیوارڈ میں کھیلے گئے بی ڈبلیو ایف سوپر500 ٹورنمنٹ کے پہلے راؤنڈ کے مقابلے میں، عالمی رینکنگ میں دسویں نمبر پر موجود پی وی سندھو نے پیرو کی 76ویں نمبر کی کھلاڑی اینیس کیسٹیلو کو یکطرفہ مقابلے میں 21-13، 21-11 سے شکست دی۔ سندھو نے یہ میچ محض 32 منٹ میں اپنے نام کیا۔ پری کوارٹر فائنل میں پی وی سندھو کا مقابلہ اپنے ہی ملک کی اشرانی بروا (عالمی رینکنگ 39) سے ہوگا، جنہوں نے پہلے راؤنڈ میں چین کی ہان کیانسی کو 22-20، 10-21، 21-14 سے شکست دی ہے ۔ یہ ان دونوں ہندوستانی کھلاڑیوں کے درمیان کیریئر کا پہلا مقابلہ ہوگا۔ 17 سالہ نوجوان کھلاڑی تنوی شرما نے زبردست فارم کا مظاہرہ کرتے ہوئے چائنیز تائپے کی عالمی نمبر 11 چیو پن چیان کو 21-12، 22-20 سے ہرا کر دوسرے راؤنڈ میں قدم رکھا۔ عالمی نمبر 36 تنوی شرما کے لیے یہ جیت اہم ہے کیونکہ وہ رواں سال گزشتہ 8 ٹورنامنٹس میں سے صرف دو بار ہی پہلے راؤنڈ سے آگے بڑھ پائی تھیں۔ دوسرے راؤنڈ میں تنوی شرما کا مقابلہ ہندوستان ہی کی مالویکا بنسوڈ سے ہوگا، جنہوں نے تھائی لینڈ کی ٹونرگ ساہینگ کو 15-21، 21-7، 21-13 سے شکست دے کر اگلے مرحلے میں جگہ بنائی ہے ۔ویمنز سنگلز میں شاندار کامیابیوں کے برعکس، مینز سنگلز (مردوں کے زمرے ) میں ہندوستان کا سفر پہلے ہی راؤنڈ میں ختم ہو گیا۔کیرن جارج کو ملائیشیا کے جسٹن ہوہ نے 21-19، 14-21، 21-15 سے ہرایا۔کوالیفائنگ راؤنڈ سے آنے والے سنیت دیانند کو چین کے ہو ژے آن کے ہاتھوں شکست کا سامنا کرنا پڑا۔عالمی رینکنگ میں 45ویں نمبر پر موجود تھارون منے پلی نے چائنیز تائپے کے دسویں نمبر کے کھلاڑی لن چون ای کو سخت ٹکر دی، لیکن وہ 18-21، 21-13، 23-25 سے میچ ہار گئے ۔
