اقلیتوں کی فلاح و بہبود کیلئے کانگریس حکومت کے اقدامات، این راجندر ریڈی
ہنمکنڈہ ۔ 29 ستمبر (سیاست ڈسٹرکٹ نیوز) ورنگل مغربی حلقہ میں مسلم اقلیتوں کو شادی خانہ کی تعمیر کے لیے موزوں زمین الاٹ کرنے کے حکومت کے فیصلے پر ورنگل ویسٹ حلقہ کے ایم ایل اے ناینی راجندر ریڈی نے مذہبی رہنماؤں کو 0.25 گنٹہ اراضی الاٹمنٹ کا دستاویز پیش کیا۔ منگل کو ایم ایل اے نے اقلیتی مذہبی رہنماؤں اور بزرگوں کی موجودگی میں الاٹ کی گئی زمین کا بہ ذات خود مسلم دانشوروں کے ساتھ معائنہ کیا۔اس موقع پر ایم ایل اے نے کہا کہ اگرچہ ماضی میں شادی خانہ کی تعمیر کے لیے زمین مختص کی گئی تھی لیکن حکام نے زمین کے حالات اور مستقبل میں تعمیر کے لیے درپیش مشکلات کا جائزہ لیا ہے۔ راجندر ریڈی نے کہا کہ کانگریس حکومت اقلیتوں کی بہبود کے تعلق سے سیاست سے بالاتر ہو کر کام کر رہی ہے۔ انہوں نے کہا کہ شادی خانہ کی تعمیر سے مسلم اقلیتی خاندانوں کو شادی بیاہ اور دیگر سماجی پروگرام منعقد کرنے میں آسانی ہوگی۔ انہوں نے یقین دلایا کہ وہ ضروری مزید اقدامات کو مکمل کرنے کے لیے حکام کے ساتھ تال میل کریں گے اور ان کی جلد تکمیل کے لیے کام کریں گے۔اس تقریب میں قاضی پیٹ درگاہ حضرت افضل بیابانی کے سجادہ و ریاستی حج کمیٹی کے چیئرمین حضرت مولانا محمد سید غلام افضل بیابانی المعروف خسرو پاشاہ اور ڈسٹرکٹ لائبریری آرگنائزیشن کے چیئرمین عزیز خان، ضلع کانگریس اقلیتی چیرمین عزیز اللہ بیگ سابق کارپوریٹرس ابوبکر، نسیم جان، وجے شری راضا علی ، قائدین انکس، بابائے، حافظ مجاہد، حافظ سمیع، اقلیتی مذہبی قائدین، مقامی قائدین، عہدیداران، کانگریس پارٹی قائدین، کارکنان اور دیگر نے اس پروگرام میں شرکت کی۔
