نئی دہلی: حکومت نے پیر کو پارلیمنٹ کو بتایا کہ شمال مشرق کے راستے بنگلہ دیش کے ساتھ رابطے کو بڑھانے میں حالیہ برسوں میں اہم پیشرفت ہوئی ہے اور وبائی امراض کے بعد دونوں ممالک کے درمیان ریل اور بس خدمات دوبارہ شروع ہو گئی ہیں۔شمال مشرقی خطے کی ترقی کے وزیر جی کشن ریڈی نے لوک سبھا میں ایک سوال کے تحریری جواب میں کہا کہ نیو جلپائی گوڑی سے ڈھاکہ کے لیے ہلدی باڑی۔چلاہاٹی کے راستے متھالی ایکسپریس یکم جون سے چلنا شروع ہو گئی ہے ۔ یہ ہندوستان اور بنگلہ دیش کے درمیان تیسری مسافر ٹرین سروس ہے ۔انہوں نے کہا کہ اگرتلہ (تریپورہ) کو اکھوڑہ (بنگلہ دیش) سے جوڑنے والا ’اگرتلہ۔ اکھوڑہ۔ریل لنک‘ را ستہ اور ’مہیساسن (انڈیا) ۔ زیرو پوائنٹ (بنگلہ دیش) نئی لائن‘ کی تعمیر سے دونوں ممالک کے درمیان رابطے میں بھی بہتری آئے گی۔ کشن ریڈی نے بتایا کہ سبروم میں دریائے فینی کے اوپر میتری سیتو کی تعمیر مکمل ہو چکی ہے اور تریپورہ اسٹیٹ روڈ ٹرانسپورٹ کارپوریشن (ٹی آر ٹی سی) کے ذریعے تریپورہ سے کولکتہ کے راستے بنگلہ دیش کے لیے رائل فرینڈ شپ انٹرنیشنل بس سروس شروع ہو گئی ہے ۔
