پریاگ راج: پریاگ راج کی ایک عدالت نے چہارشنبہ کو شہ زور لیڈر و سابق ایم پی عتیق احمد و ان کے بھائی اشرف علی کے قتل کے تینوں ملزمین کو چار دنوں کی پولیس تحویل میں بھیجنے کی ہدایت دی ہے ۔ضلع سرکاری وکیل(فوجداری) گلاب چندر اگہری نے بتایا کہ چیف جوڈیشیل مجسٹریٹ(سی جے ایم)دنیش چندر گوتم کی اسپیشل عدالت نے عتیق اور اشرف کے تینوں شوٹروں کو چار دنوں کی پولیس ریمانڈ کی ہدایت دی ہے ۔ ریمانڈ کی مدت 23اپریل شام پانچ بجے تک ہوگی۔ریمانڈ ملنے کے بعد پولیس لولیش تیواری، ارون موریہ اور موہت عرف سنی موریہ کو سخت پوچھ گچھ کیلئے ریزرو پولیس لائن لے گئی۔ پولیس نے سات دن کی ریمانڈ کی عرضی دی تھی لیکن اسپیشل مجسٹریٹ نے ان کے مطالبے کو منظور کرتے ہوئے چاردنوں کی ریمانڈ کا حکم دیا۔ سیکورٹی کے لحاظ سے پولیس تینوں ملزمین کا چہرہ ڈھک کر دوڑتے ہوئے عدالت میں پیش کرنے لے گئی۔عتیق اور اشرف کا معاملے ایس آئی ٹی کے ہاتھ میں ہے ۔ تینوں ملزمین کو جج دنیش چندر گوتم کی عدالت میں تقریبا 10:45بجے پیش کیا گیا تھا۔ تینوں شوٹروں کو پولیس ریمانڈ ملنے کے بعد کورٹ احاطے میں موجود کچھ وکیلوں نے جئے شری رام کے نعرے لگائے ۔
