یہ بِل ابھی عزت مآب صدر جمہوریہ تک پہنچا ہی نہیں، وزیر اعلیٰ مغربی بنگال کی پریس کانفرنس
کولکاتا۔ 26 ستمبر (یواین آئی) مغربی بنگال کے وزیر اعلیٰ شوبھندو ادھیکاری نے ان خبروں کو مسترد کردیا ہے جن میں کہا گیا تھا کہ صدر دروپدی مرمو نے ریاست کے متنازع ‘غنڈہ مخالف’ بل کو واپس کردیا ہے۔ انہوں نے کہا کہ یہ قانون ابھی صدر کے پاس پہنچا ہی نہیں ہے ۔ ادھیکاری نے جمعہ کی رات ریاستی سیکریٹریٹ میں اچانک ایک پریس کانفرنس طلب کی۔ انہوں نے صحافیوں سے کہا کہ یہ خبریں جعلی ہیں اور بل پر ابھی مرکزی وزارت داخلہ میں کارروائی جاری ہے ۔ انہوں نے کہاکہ بل ابھی معزز صدر تک پہنچا ہی نہیں ہے ۔ یہ مرکزی وزارت داخلہ میں جوائنٹ سکریٹری کی سطح پر ہے ۔ ہم نے دوپہر سے ہی اس بارے میں تفصیلی معلومات حاصل کی ہیں۔ بل اب بھی وزارت داخلہ کے پاس ہے ۔ وزیر اعلیٰ کی یہ پریس کانفرنس ان خبروں کے چند گھنٹے بعد ہوئی، جن میں کہا گیا تھا کہ صدر نے مغربی بنگال عوامی تحفظ اور سماج دشمن سرگرمیوں پر کنٹرول بل، 2026′ (غنڈہ مخالف بل) کو منظوری دینے سے انکار کردیا ہے اور اسے ریاستی حکومت کو واپس بھیج دیا ہے ۔ ان خبروں کے بعد اپوزیشن نے حکومت پر تنقید شروع کردی اور ترنمول کانگریس، کانگریس سمیت دیگر جماعتوں نے بی جے پی حکومت کو نشانہ بنایا۔ خبروں کو مسترد کرتے ہوئے ادھیکاری نے کہاکہ نہیں، یہ سب بے بنیاد، جعلی خبریں اور افواہیں ہیں۔ اس طرح کی افواہیں جان بوجھ کر پھیلائی جارہی ہیں۔ بل میں کوئی مسئلہ نہیں ہے ۔ وزیر اعلیٰ نے واضح کیا کہ صدر کی جانب سے بل واپس کیے جانے کی خبریں شاید منشیات سے متعلق دفعات اور موجودہ نارکوٹک ڈرگز اینڈ سائیکوٹروپک سبسٹینسز (این ڈی پی ایس) قانون کے ساتھ ان کے ممکنہ ٹکراؤ سے متعلق غلط فہمی کی وجہ سے پھیلی ہیں۔ انہوں نے ایسی خبریں پھیلانے والوں کو تنقید کا نشانہ بناتے ہوئے کہاکہ بے مطلب کی من گھڑت باتیں نہ لکھیں۔ جائیے ، کھانا کھائیے اور سو جائیے ۔ ریاستی اسمبلی سے گزشتہ جون میں منظور کیے گئے اس بل کا مقصد سماج دشمن سرگرمیوں کی روک تھام کے لیے اقدامات کرنا ہے ۔ اس میں ’سماج دشمن سرگرمیوں‘اور ’غنڈوں‘کی تعریف سے متعلق دفعات بھی شامل ہیں۔ بل میں مجاز سینئر افسران کے حکم پر کسی شخص کو ایک سال تک کسی مخصوص علاقے ، شہر یا ضلع سے باہر نکالنے کا بھی انتظام ہے ۔
