مدینہ منورہ: مدینہ منورہ بس سرویس منصوبے کی انتظامیہ نے کہا ہے کہ ماہ مقدس کے دوران مسجد نبوی صلی اللہ علیہ وآلہ وسلم کے 5 لاکھ سے زیادہ زائرین نے بسوں کے ذریعے سفر کیا ہے ۔سبق ویب کے مطابق مدینہ منورہ بس سرویس منصوبے کی انتظامیہ نے کہا کہ یکم رمضان المبارک سے بس سرویس کا آغاز کیا گیا۔7 مختلف سٹیشن زائرین کی بہتر خدمت کیلئے مقرر کئے گئے ہیں جو مختلف روٹس سے مسجد نبوی صلی اللہ علیہ وآلہ وسلم لے جاتے ہیں۔واضح رہے کہ مدینہ بس سرویس سٹیڈیم، درۃ المدینہ، سید الشہدا، اسلامی یونیورسٹی، الخالدیہ، شطیہ اور بنی حارثہ سے بسیں مسجد نبوی لے جاتی ہیں اور واپس لاتی ہیں۔دوسری جانب سعودی عرب میں ریاض کے کنگ خالد انٹرنیشنل ایئرپورٹ پر ای گیٹس کے پہلے مرحلے کا آغاز کردیا گیا ہے۔ریاض ایئرپورٹ پر ابتدائی طورپر ٹریول ہالز نمبر 3 اور4 پر ای گیٹس کو نصب کردیا گیا ہے ۔ریاض ایئرپورٹ پر ای گیٹس کے افتتاح کے موقع پر سعودی ڈیٹا اینڈ آرٹیفیشل انٹیلجنس اتھارٹی سدایا کے سربراہ ڈاکٹر عبداللہ بن شریف و دیگر بھی موجود تھے ۔
ڈائریکٹر جوازات بریگیڈیئرسلمان الیحیی کا اس موقع پرکہنا تھا کہ ریاض کے کنگ خالد انٹرنیشنل ایئرپورٹ پر ای گیٹس کی تنصیب سے مسافروں کو سہولت میسر ہوگی۔ای گیٹس کی سہولت کے باعث انسانی مداخلت کے بغیر مسافر اپنے سفری معاملات خود کارطریقے سے انجام دے سکیں گے جس سے ان کا قیمتی وقت بھی بچے گا۔
