نئی دہلی: صدر جمہوریہ دروپدی مرمو، نائب صدر جمہوریہ جگدیپ دھنکھڑ اور دیگر معززین نے منگل کو سکم کے یوم تاسیس کے موقع پر ریاست کے لوگوں کو مبارکباد دی۔ مرمو نے ٹویٹ کیا کہ میں سکم کے لوگوں کو سکم کے یوم تاسیس پر مبارکباد پیش کرتی ہوں! سکم جدیدیت اور انوکھی روایات کا امتزاج پیش کرتا ہے ۔’’ انہوں نے کہا کہ شمال مشرقی ریاست نے نامیاتی کاشتکاری کی راہ ہموار کی ہے ، حیاتیاتی تنوع کو فروغ دیا ہے اور پائیدار ترقی کیلئے ایک ماڈل بنایا ہے ۔ مرمو نے کہا کہ پچھلے سال ریاست کے اپنے دورے کے دوران، میں لوگوں کی گرمجوشی سے متاثر ہوئی تھی۔ سکم کی مسلسل ترقی کیلئے میری نیک خواہشات۔ دھنکھڑ نے ٹویٹ کیا کہ سکم کے یوم تاسیس پر دل کی گہرائیوں سے مبارکباد! سکم کے لوگوں کیلئے ایک خوشحال مستقبل کیلئے میری نیک تمنائیں! خوبصورت پہاڑوں اور بھرپور حیاتیاتی تنوع کا گھر، سکم منفرد قدرتی خوبصورتی کی سرزمین ہے۔
انہوں نے کہا کہ پائیدار ترقی، نامیاتی کھیتی اور صفائی کے تئیں ریاست کا عزم واقعی متاثر کن ہے ۔ مرکزی وزیر داخلہ امیت شاہ نے کہا کہ سکم کے یوم تاسیس پر ریاست کے لوگوں کو دل کی گہرائیوں سے مبارکباد۔ سکم شمال مشرقی ہندوستان میں ایک ’جواہر‘ ہے ، اس کے محنتی لوگ ملک کی ثقافت اور معیشت میں بہت زیادہ حصہ ڈال رہے ہیں۔ میری خواہش ہے کہ ریاست آنے والے برسوں میں ترقی کرتی رہے ۔ کانگریس کے صدر ملکارجن کھڑگے نے کہاکہ سکم کے یوم تاسیس کے موقع پر، ہم قدرتی حسن اور بھرپور ثقافتی تنوع سے مالا مال اس خوبصورت ریاست کے لوگوں کو دل کی گہرائیوں سے مبارکباد پیش کرتے ہیں۔ ہم آپ کیلئے امن، ترقی اور خوشحالی کی خواہش کرتے ہیں۔ کانگریس کے سابق صدر راہل گاندھی نے ٹویٹ کیا کہ ریاست کے یوم تاسیس پر ریاست کے لوگوں کو مبارکباد! قدرتی خوبصورتی اور بھرپور ورثے کی سرزمین، سکم تنوع میں اتحاد اور ہم آہنگی کی نمائندگی کرتا ہے ۔
