بروقت کارروائی پر نرمل میں اردو میڈیم طلبہ کیلئے خصوصی ریاضی ٹیلنٹ ٹسٹ
نرمل۔/20 ڈسمبر، ( سیاست ڈسٹرکٹ نیوز) ضلع نرمل میں تلنگانہ میتھس فورم کی جانب سے مسلم اقلیتی طلبہ ( اردو میڈیم کے ساتھ لسانی تعصب کے خلاف ریاستی اقلیتی کمیشن کی نوٹس کے بعد ضلع مہتمم تعلیمات پی راما راؤ نے تلنگانہ میتھس فورم کے صدر اور جنرل سکرییٹری کو وجہ نمائی نوٹس جاری کرتے ہوئے اردو میڈیم کے طلبہ کیلئے ریاضی ٹیلنٹ ٹسٹ کے عدم انعقاد کی وجوہات طلب کیں۔ اس کے بعد فورم نے ضلع مہتمم تعلیمات سے اردو میڈیم طلبہ کیلئے علیحدہ طور پر ریاضی ٹیلنٹ ٹسٹ منعقد کرنے کی اجازت طلب کی۔ ضلع مہتمم تعلیمات نے فوری کارروائی کرتے ہوئے 20 ڈسمبر بروز جمعہ زیڈ پی ایچ ایس ، منجلا پور میں ریاضی ٹیلنٹ ٹسٹ منعقد کرنے کی ہدایت جاری کی۔ اس پر عمل کرتے ہوئے فورم نے ٹسٹ منعقد کیا جس میں ضلع بھر کے تمام اردو میڈیم سرکاری ہائی اسکولوں کے طلبہ نے شرکت کی۔ واضح رہے کہ ٹی ایم ایف نرمل نے 11 ڈسمبر کو صرف تلگو اور انگریزی میڈیم طلبہ کیلئے ٹسٹ منعقد کرتے ہوئے اردو میڈیم کے طلبہ کے ساتھ لسانی تعصب کا مظاہرہ کیا اور ان کے حوصلے پست کرنے کی کوشش کی۔ اس رویئے کے خلاف میوا اور ٹی ایس پی ٹی اے کے نمائندہ وفد نے ضلع مہتمم تعلیمات اور ضلع کلکٹر سے شکایت کی تھی۔ تاہم جب ذمہ داران کے خلاف کارروائی نہیں کی گئی تو ریاستی اقلیتی کمیشن میں شکایت درج کروائی گئی۔ ریاستی اقلیتی کمیشن نے اس معاملے کا سخت نوٹ لیتے ہوئے ڈائرکٹر ایس سی ای آر ٹی حیدرآباد ، نرمل ضلع کلکٹر ، ضلع مہتمم تعلیمات اور ٹی ایم ایف نرمل کے صدر و سکریٹری کونوٹس جاری کرکے رپورٹ طلب کی۔ ڈاکٹر ساجد معراج نے بتایا کہ کمیشن کی بروقت کارروائی کے نتیجے میں ضلع مہتمم تعلیمات نے فوری اقدامات کرتے ہوئے اردو میڈیم طلبہ کیلئے خصوصی ریاضی ٹیلنٹ ٹسٹ منعقد کروایا۔ انہوں نے ضلع مہتمم تعلیمات سے میتھس فورم کے ذمہ داران کے خلاف کارروائی کرنے کا مطالبہ کیا۔ اس کے علاوہ ان سے درخواست کی کہ تمام میڈیم کے طلبہ کے ساتھ مساوی سلوک کیا جائے تاکہ قومی یکجہتی اور بھائی چارگی کو فروغ دیا جاسکے۔ بصورت دیگر انہوں نے ذمہ داران کے خلاف قانونی لڑائی لڑنے کے عزم کا اظہار کیا۔
