واشنگٹن۔ 31 مئی (یو این آئی) امریکی صدر ڈونالڈ ٹرمپ نے ایلون مسک کے لیے الوداعی تقریب سجائی، اور انھیں ’’سونے کی چابی‘‘ کا تحفہ بھی پیش کیا۔ امریکی میڈیا رپورٹس کے مطابق ڈونالڈ ٹرمپ کی جانب سے ایلون مسک کے اعزاز میں وائٹ ہاؤس میں الوداعی تقریب منعقد کی گئی، ٹرمپ نے ٹیسلا کے مالک کے ساتھ پریس کانفرنس بھی کی۔ ٹرمپ نے کہا آج مسک کا حکومتی عہدے پر آخری دن ہے ، انھوں نے محکمہ حکومتی کارکردگی کی سربراہی کی، اور وفاقی عملے میں بڑے پیمانے پر کمی کی۔ امریکی صدر نے تعریف کرتے ہوئے کہا کہ مسک نے بہترین کام کیا ہے اور امریکی حکومت کے اربوں روپے بچائے ہیں۔ انھوں نے کہا ایلون مسک ایک بہترین کاروباری شخصیت بھی ہیں، بہت شکریہ کہ انھوں نے مشکل وقت میں ہمارا ساتھ دیا۔ دریں اثنا، ڈونالڈ ٹرمپ کی جانب سے مسک کو ‘‘گولڈ کی’’ کا تحفہ بھی پیش کیا گیا۔ ٹرمپ نے الوداعی تقریب میں ایلون مسک کو خراج تحسین پیش کیا اور کہا کہ یہ ان کی خدمات کے اعتراف میں خصوصی اعزاز دیا گیا ہے ۔ امریکی میڈیا کے مطابق ایلون مسک نے ریپبلکن انتظامیہ میں اپنا کردار ختم کر دیا ہے ، انھوں نے 4 ماہ تک حکومتی اخراجات کم کرنے والے محکمہ (ڈاج) کی قیادت کی، اور امریکی صدر کے مشیر کے طور پر بھی کام کیا، اور اس دوران ان کی ساکھ بے حد متاثر ہوئی، انھوں نے ڈاج میں وعدہ کیا تھا کہ وہ 1 ٹریلین ڈالر کی بچت کر کے دکھائیں گے تاہم وہ اس کے قریب بھی نہیں پہنچے ہیں۔
