مبئی ۔4 جولائی (یو این آئی) مغربی ریلوے نے ہفتہ کے روز مانسون کی تازہ ترین معلومات جاری کیں کیونکہ محکمہ موسمیات نے آج شہر اور مضافات میں شدید بارش کی پیش گوئی کی ہے ۔ محکمہ موسمیات کے مطابق آسمان عام طور پر ابر آلود رہے گا۔ ممبئی اور مضافاتی علاقوں میں شدید بارش کا امکان ہے ۔ کچھ مقامات پر تیز سے بہت تیز بارش ہو سکتی ہے ، جبکہ چند مقامات پر انتہائی شدید بارش کی بھی توقع ہے ۔ بارش کے باوجود مغربی ریلوے کی مضافاتی لوکل ٹرینیں معمول کے مطابق چل رہی ہیں۔ حکام نے بتایا کہ چرچ گیٹ اور دہانو روڈ کے درمیان ممبئی مضافاتی علاقوں میں خدمات معمول کے مطابق ہیں، جبکہ ماہم اور گوریگاؤں کے درمیان بھی تمام خدمات معمول کے مطابق ہیں۔ مغربی ریلوے کے سی پی آر او مسٹر وِکاس ابھیشیک نے مسافروں پر زور دیا کہ وہ باہر نکلتے وقت چھتریاں ساتھ رکھیں اور بارش کے دوران ریلوے کے اعلانات پر نظر رکھیں۔
