نئی دہلی۔12 اپریل (سیاست ڈاٹ کام) ہندستان کے سرکردہ بلے بازوں میں سے ایک وی وی ایس لکشمن نے حیرانی ظاہر کی ہے کہ وزڈن کے سال کے پانچ بہترین کرکٹرز میں ہندوستان کے روہت شرما کا نام نہیں ہے ۔وزڈن نے بدھ کو انگلینڈ کے آل راؤنڈر بین اسٹوکس اور آسٹریلیا کی آل راؤنڈر ایلس پیری کو اپنے 2020 ورژن میں دنیا کا سب سے بہترین کرکٹر قرار دیا تھا۔ 28 سالہ اسٹوکس نے 2019 میں انگلینڈ کی ون ڈے ورلڈ کپ جیت میں اہم کردار ادا کیا تھا۔ اسٹوکس نے ورلڈ کپ میں فائنل کے ناٹ آؤٹ 84 سمیت 465 رن بنائے تھے اور سات وکٹ بھی حاصل کئے تھے ۔وزڈن کے سال کے پانچ کرکٹرز میں انگلینڈ کے فاسٹ بولر جوفرا آرچر، آسٹریلیا کے تیز گیند باز پیٹ کمنز اور مارنس لابوشین، ایسیکس کے آف اسپنر سائمن ھارمر اور ایلس پیری کو جگہ ملی ہے ۔ہندستان ورلڈ کپ کے سیمی فائنل میں ہارا تھا لیکن روہت نے ٹورنامنٹ میں پانچ سنچری بنائی تھیں جو عالمی ریکارڈ ہے ۔ لکشمن نے اسٹار اسپورٹس کے شو کرکٹ کنکٹڈ میں کہاکہ مجھے اس فیصلے سے حیرانی ہوئی ہے کیونکہ وہ اس فہرست میں جگہ حاصل کرنے کے دعویدار تھے ۔ مجھے لگتا ہے جو کرکٹ کو سمجھتے ہیں وہ اس بات سے حیران ہوں گے کہ روہت کا نام ان پانچ کھلاڑیوں کی فہرست میں شامل نہیں ہے ۔لکشمن نے کہاکہ یہ ٹھیک ہے کہ ایشز ایک بڑی سیریز ہے لیکن ورلڈ کپ ایشز سے بھی بڑا ہے ۔ ورلڈ کپ میں پانچ سنچری بنانے والے کو کیسے نظر انداز کیا جا سکتا ہے ۔ انہوں نے ساؤتھمٹن کی مشکل پچ پر جنوبی افریقہ کے خلاف سنچری بنائی تھی جبکہ اسی پچ پر دیگر بلے بازوں کو رن بنانے کے لئے جدوجہد کرنا پڑی تھی۔ روہت نے پاکستان کے خلاف بھی شاندار اننگز کھیلی تھی۔ روہت کا اس فہرست میں نام نہ ہونا واقعی حیران کن ہے ۔
