نیویارک29جولائی (یو این آئی) پاکستان کے نائب وزیراعظم اور وزیرخارجہ اسحق ڈار نے کہا ہے کہ پاکستان کا اسرائیل کوتسلیم کرنے کا کوئی منصوبہ نہیں، دورہ امریکہ ہر لحاظ سے کامیاب رہا، امریکی وزیر خارجہ کو باور کرایا کہ مذاکرات کے بغیر خطے میں امن ممکن نہیں۔نیویارک میں پریس کانفرنس سے خطاب کرتے ہوئے نائب وزیراعظم اسحق ڈار نے کہا کہ پاکستان کا اسرائیل کوتسلیم کرنے کا کوئی منصوبہ نہیں، ہر موقع پر فلسطین کے ساتھ کشمیر کے مسئلہ کو اُجاگر کیا۔ انہوں نے کہا کہ دورہ امریکہ ہرلحاظ سے کامیاب رہا، امریکی وزیر خارجہ کو باور کرایا کہ مذاکرات کے بغیرخطہ میں امن ممکن نہیں، امریکی وزیرخارجہ سے تجارت اور ٹیرف سے متعلق گفتگو کی۔اسحق ڈار نے کہا کہ ہندوستان کے ساتھ ڈائیلاگ ہوا تو جامع ہوگا۔ ہندوستان جب بھی کمپوزٹ ڈائیلاگ کرنا چاہے ، پاکستان تیار ہے ، ہندوستان سندھ طاس معاہدے کو یکطرفہ طورپرختم نہیں کرسکتا۔دریں اثنا، نائب وزیراعظم
اور وزیر خارجہ اسحق ڈار نے کویت کے وزیر خارجہ عبداللہ الیحییٰ سے ملاقات کی ہے ، دونوں کے درمیان ملاقات بین الاقوامی فلسطین کانفرنس کی سائیڈ لائنز ملاقاتوں کے دوران ہوئی۔ترجمان دفترخارجہ کے مطابق ملاقات میں پاکستان اور کویت کے دوطرفہ تعلقات کی مزید مضبوطی سمیت تجارت سیکورٹی اور دفاع کے شعبہ جات میں تعاون کا اعادہ کیا گیا۔ دونوں رہنماؤں نے اقوام متحدہ اور او آئی سی کے ساتھ مزید معاونت پر اتفاق کیا، اعلامیہ کے مطابق ملاقات میں دو طرفہ تعلقات کی مضبوطی کے لئے اعلی سطحی وفود کے تبادلوں پر اتفاق کیا گیا۔
