جے پور: راجستھان میں کانگریس ارکان اسمبلی کی الگ مقام پر رکھنے کے بعد ڈپٹی چیف منسٹر کے عہدے سے برطرف کئے گئے سچن پائلٹ کی کانگریس واپسی بہت مشکل ہے۔ کانگریس قانون ساز اسمبلی کے لیڈر نے پائلٹ کو برطرف کرنے کی قرار اتفاق رائے سے منظور کی تھی۔ پائلٹ کی برطرفی کے بعد چیف منسٹر اشوک گہلوٹ نے پائلٹ پر حکومت گرانے کے لئے 20 کروڑ کی سودے بازی کرنے کا الزام لگایا تھا۔ پائلٹ نے طویل خاموشی کے بعد جب یہ کہا کہ وہ بھارتیہ جنتاپارٹی (بی جے پی) میں نہیں جائیں گے تو یہ قیاس لگائے جانے لگے کہ ان کی کانگریس میں واپسی ہوسکتی ہے ۔ پائلٹ کے لئے نرم رخ رکھتے کانگریس اعلی کمان نے انہیں جے پور واپس آنے کے لئے کہا تھا لیکن وہ نہیں آئے ۔ حکومت گرانے میں پائلٹ کا کردار سامنے آنے کے بعد ان کے خلاف کانگریس لیڈروں میں کافی ناراضگی ہے اور وہ نہیں چاہتے کہ پائلٹ واپس آئیں کیونکہ ان کے آنے کے بعد گروپ بندی میں پھر سے اضافہ ہوسکتا ہے ۔پائلٹ سمیت ان کے 19 حامی ارکان اسمبلی کے قانون ساز پارٹی کی میٹنگ میں نہ آنے کے سبب وہپ کی خلاف ورزی کرنے کا نوٹس جاری کیا جاسکتا ہے ۔ اس معاملے پر کانگریس کے کچھ لیڈروں کا ماننا ہے کہ وہپ کی خلاف ورزی کرنے پر پائلٹ کی رکنیت جاسکتی ہے ۔
