میلبورن ، 8جون (سیاست ڈاٹ کام) آسٹریلیائی ٹیم کے سابق کپتان مائیکل کلارک اور سابق آسٹریلیائی خاتون کرکٹر لینٹی لارسن کو آرڈر آف آسٹریلیا کے اعزاز کے لئے منتخب کیا گیا ہے ۔2015 میں آسٹریلیائی ٹیم کو اپنی کپتانی میں ورلڈ چمپیئن بنانے والے کلارک کو آرڈر آف آسٹریلیا کے جنرل ڈویژن میں افسر مقرر کیا گیا ہے جبکہ لارسن کو کوئینز برتھ ڈے2020 آنرز لسٹ کا ممبر مقرر کیا گیا ہے ۔کلارک نے آسٹریلیا کے لئے 114 ٹسٹ کھیلے اور47 ٹسٹ میں ٹیم کی کپتانی کی جبکہ لارسن نے آسٹریلیا کے لئے15 ٹسٹ اور49 ونڈے میچ کھیلے ۔2015 میں اپنی کپتانی میں آسٹریلیا کو عالمی چمپیئن بنانے والے کلارک نے اپنے کیریئر میں چارمرتبہ ایلن بارڈر میڈل جیتا ہے۔ انہوں نے ٹسٹ میں 8643 رنز49.10 اوسط اور28 سنچریاں اور ونڈے میچوں میں7981 رنز44.58 اوسط اورآٹھ سنچریاں بنائے ۔ لارسن کا1984-94 تک 10 سالہ کریئر تھا جس میں انہوں نے ٹسٹ میں اوسطا41 اور ونڈے میں20.28 اوسط سے رنز بنائے ۔انہوں نے مجموعی طور پر53 میچوں میں آسٹریلیائی ٹیم کی کپتانی کی ، جس میں1988 میں خواتین کے ورلڈ کپ کی فتح بھی شامل ہے ۔ انہوں نے اس اعزاز پر سب کا شکریہ ادا کیا۔آرڈر آف آسٹریلیا کے اعزاز میں20 سے زائد آسٹریلیائی کھلاڑیوں کو اعزازات سے نوازا گیا ہے جن میں سر ڈونلڈ بریڈمین ، باب سمپسن ، ایلن بارڈر ، اسٹیو وا ، مارک وا ، رکی پونٹنگ ، ڈینس للی ، ایڈم گلکرسٹ ، ڈین جونز ، مارک ٹیلر اورگلین میک گراتھ شامل ہیں۔ جبکہ غیر آسٹریلیائی کھلاڑیوں میں یہ اعزاز سچن تندولکر ، برائن لارا ، کلائیو لائیڈ اور سرگارفیلڈ سوبرزکو دیا گیا ہے ۔
