کولکتہ۔20 ڈسمبر (سیاست ڈاٹ کا م) سابق جارحانہ بیٹسمین اور کولکتہ نائٹ رائڈرس کے رواں سیزن میں چیف کوچ مقررکئے گئے برینڈن میکلم نے کہا کہ ان کی ٹیم کو سنچریاں بنانے والے درکار ہیں۔میکلم نے سال 2008 میں آئی پی ایل کے ابتدائی سیزن میں رائل چیلنجرز بنگلور کے خلاف 73 گیندوں پر 158 رنوں کی اننگز کھیلی تھی اور وہ بہت مقبول ہوئے تھے۔ حالانکہ کے کے آر چھوڑنے کے بعد ٹیم میں ان جیسا کوئی سنچری بنانے والا نہیں رہا ہے۔اس سیزن میں کے کے آر کے چیف کوچ کا عہدہ سنبھالنے والے میکلم نے کہا ہے کہ 11 برسوں کی خشک سالی کا خاتمہ ضروری ہے۔ 38 میکلم جمعرات کو آئی پی ایل کی نیلامی میں شرکت کے لئے کولکاتہ پہنچے۔ انہوں نے میڈیا سے کہا میرے بعد کوئی بھی سنچری بنانے والا نہیں ہوا۔ کیا آپ سنجیدہ ہیں؟ ہم جلد ہی اس مسئلے کو حل کریں گے۔ ہم اس بات کو یقینی بنائیں گے کہ ٹیم کو کچھ ایسے بیٹسمین ملیں جو سنچری بنائیں۔انہوں نے کہا بہت سارے ہندوستانی کرکٹر ہیں جو باصلاحیت ہیں۔ ہم کوشش کریں گے کہ عظیم کھلاڑیوں کا پول تیار کر سکیں۔ کے کے آر کے ساتھ بطورکھلاڑی اپنی مدت کار کے پیش نظر میکلم نے کہا اس بات کو طویل عرصہ ہوگیا ہے۔ مجھے یاد ہے جب میں یہاں پہلی مرتبہ آیا تھا اور ہمیں نہیں معلوم تھا کہ ہم یہاں کس طرح کھیلیں گے۔ لیکن اب میں اس ٹیم کا کوچ ہوں جو ایک بہت اچھا احساس ہے۔اسی کے ساتھ میکلم نے کے کے آر شائقین سے بھی اپنی ٹیم کی حمایت کرنے کی اپیل کی ہے۔ انہوں نے کہا میں نے اپنے افراد خاندان کے ساتھ یہاں کافی وقت گزارا ہے۔ یہاں واپس آنا اچھا ہے اور خاص کر ایڈن گارڈن کا تجربہ بہت اچھا رہا ہے۔ یہاں مداحوں سے شاندار حمایت ملتی ہے۔ امید ہے کہ ہم آئندہ سیزن میں ٹرافی جیت سکتے ہیں۔
