ہانگ کانگ،14نومبر (سیاست ڈاٹ کام) ہانگ کانگ میں حکومت مخالف مظاہرین نے جمعرات کو مسلسل چوتھے دن شاہراہ اور نقل وحمل کے دیگر ذرائع میں رکاوٹ پیداکرنا جاری رکھا جس کی وجہ سے شہر کے اسکول،یونیورسٹی اور شاپنگ مال بند کرنے پڑے ۔بی بی سی کی رپورٹ کے مطابق اس دوران پولیس نے مظاہرین کو منتشر کرنے کے لئے آنسوں گیس کے گولے بھی چھوڑے ۔کل رات شہر کے ایجوکیشن بیورو نے اعلان کیا کہ احتیاط کے طور پر سبھی اسکول بند رہیں گے ۔کئی یونیورسٹیوں نے بھی جمعرات سے اپنے کیمپس بند رکھنے اور ان میں پڑھائی نہ ہونے کا اعلان کیا ہے ۔شہر کے کئی اہم شاپنگ مال نے آج بند رہنے کا اعلان کیا ہے ۔میڈیا نے مقامی ہاسپٹل کے افسروں کے حوالے سے بتایا کہ چین انتظامیہ اس علاقے میں حال ہی میں ہوئے مظاہروں کے دوران پولیس اور مظاہرین کے درمیان ہوئی جھڑپوں میں اب تک 64افراد زخمی ہوئے ہیں اور انہیں ہانگ کانگ کے مختلف ہاسپٹلس میں داخل کرایاگیا ہے ۔
