کسانوں اور زراعت کے شعبہ کی مدد کیلئے مرکزی حکومت پرعزم ہے :تومر
نئی دہلی: وزیر زراعت نریندر سنگھ تومر نے منگل کو کہا کہ ہم سب کو خود کفیل ہندوستان، ترقی یافتہ زراعت اور خوشحال کسانوں کے مقصد کیلئے وقف ہونا چاہیے ۔خریف مہم2022 ء کیلئے قومی زراعت کنونشن سے خطاب کرتے ہوئے تومر نے کہا کہ مرکزی حکومت کے ساتھ ساتھ تمام ریاستی حکومتیں زراعت کے شعبے میں بہتر کام کر کے کسانوں کی مالی حالت کو بہتر بنانے کے مقصد سے ذمہ داری کے ساتھ کام کر رہی ہیں۔ اس کے نتیجے میں ملک غذائی اجناس، باغبانی اور دیگر زرعی مصنوعات کے حوالے سے بہت اچھی پوزیشن پر ہے ۔ اس کے لیے انہوں نے کسانوں کی محنت، سائنسدانوں کے تعاون اور حکومتی پالیسیوں کی تعریف کی۔انہوں نے ریاستی حکومتوں سے کہا کہ وہ مرکز کے اداروں کے ساتھ مشترکہ حکمت عملی بنائیں تاکہ بیج اور کھاد آسانی سے دستیاب ہوسکے ۔ حکومتیں کسانوں کے سامنے جوابدہ ہیں، اس لیے ان کی کوشش ہونی چاہیے کہ کسانوں کی لاگت کو زیادہ سے زیادہ کم کیا جائے ۔ بیج کو انتہائی سنجیدگی سے لیتے ہوئے طریقہ کار کو تیار کرتے ہوئے بیج مارکیٹ کو سمت دینے اور قیمت میں توازن پیدا کرنے کی کوشش کی جانی چاہیے ۔ بیجوں اور کیڑے مار ادویات کے معیار کو بہتر بنانے میں ریاستوں کا کردار بھی اہم ہے اور کسانوں کو دھوکہ نہیں دیا جاتا ہے ۔وزیر زراعت نے کہا کہ کسانوں اور کھیتی باڑی کی مدد کرنے کیلئے مرکزی حکومت پرعزم ہے، اس لیے سبسڈی بھی دی جا رہی ہے لیکن کسانوں کو متوازن استعمال اور متبادل اقدامات کو اپنانے کیلئے آگاہ کیا جانا چاہیے ۔ اس سلسلے میں ریاستی حکومتوں کی ذمہ داری ہے کہ وہ ٹھوس حکمت عملی بنا کر مناسب انتظام کریں۔ مسٹر تومر نے کہا کہ مرکزی حکومت کا نامیاتی اور قدرتی کھیتی پر زور ہے اور یہ اطمینان کی بات ہے کہ ریاستی حکومتیں اس سمت میں کام کر رہی ہیں۔ حال ہی میں وزیر اعظم نریندر مودی نے آنند (گجرات) میں ایک قومی کانفرنس منعقد کی جس میں قدرتی کھیتی پر بہت زور دیا گیا اور پورے ملک کے کسانوں کو اس سے جوڑا گیا۔انہوں نے کسانوں سے قدرتی کاشتکاری کا طریقہ اختیار کرنے کی اپیل کی ۔ انہوں نے خود کفیل اور مضبوط ہندوستان کی تعمیر کی سمت میں تیل کے بیجوں اور دالوں کے رقبہ اور پیداوار میں مزید اضافہ کرکے اس فرق کو ختم کرنے پر زور دیا۔ حکومت سورج مکھی کے رقبہ اور پیداوار کو بڑھانے کیلئے بھی سنجیدہ ہے ، جس کیلئے حال ہی میں ایک اعلیٰ سطحی میٹنگ میں تمام ریاستی حکومتوں کے ساتھ تفصیلی بات چیت ہوئی ہے ۔
