چینائی: پاکستان کرکٹ ٹیم کے فاسٹ بولر شاہین شاہ آفریدی کا کہنا ہے کہ ہم شائقین کی توقعات پوری کرنے کیلئے بے چین ہیں۔ آئی سی سی ونڈے ورلڈکپ میں پاکستان پیر کو افغانستان کے خلاف اپنا پانچواں میچ ایم اے چدمبرم اسٹیڈیم میں کھیلے گا، اس سے قبل پاکستان چار میچز میں دو میں فتح اور دو میں شکست درج کرا چکا ہے۔ فاسٹ بولر شاہین اس بات پر یقین رکھتے ہیں کہ آخری دو میچوں سے ٹیم نے جو کچھ سیکھا ہے وہ اگلے میچوں میں مددگار ثابت ہوگا۔ شاہین نے پی سی بی ڈیجیٹل سے بات کرتے ہوئے کہا کہ شائقین کی توقعات کا اندازہ ہے اور ہم سب ان توقعات کو پورا کرنے کیلئے بے چین ہیں۔ شکست ، شکست ہوتی ہے اور ہمیں اسے تسلیم کرنا چاہیے لیکن ٹیم کیلئے بہتر ہوگا کہ ہم اس سے سیکھیں۔ آنے والے دو میچز ہمارے لئے بہت اہم ہیں ، ہم ابھی ٹورنمنٹ میں موجود ہیں ، ہم ورلڈکپ جیت کر تاریخ بنانے کیلئے یہاں موجود ہیں۔ شاہین آفریدی نے کہا کہ ورلڈ کپ جیسے ٹورنمنٹ میں کوئی بھی ٹیم کسی کو بھی ہراسکتی ہے لہذا آپ کسی طور بھی اطمینان سے نہیں بیٹھ سکتے ، افغانستان کی ٹیم اچھا کھیل رہی ہے اور اس نے انگلینڈ کو ہرایا ہے, ہمیں اس کے خلاف اپنی بہترین مہارت دکھانی ہوگی, ان کے پاس ورلڈ کلاس اسپنرز ہیں۔ تاہم ہماری بیٹنگ بھی اچھا کررہی ہے۔ آسٹریلیا کے خلاف پانچ وکٹیں لینے والے شاہین کہتے ہیں کہ مجھے پتہ تھا کہ بنگلور ہائی اسکورنگ گراؤنڈ ہے جس کیلئے ذہنی طور پر تیار تھا، میں نے مختلف ویری ایشن کوشش کیں اور لینتھ کا خیال رکھا جس سے فائدہ ہوا۔ شاہین کا خیال ہے کہ انگلینڈ اور نیوزی لینڈ کے مقابل انڈیا میں گیند زیادہ سوئنگ نہیں ہوتی، بولر کیلئے ضروری ہے کہ وہ حالات سے ہم آہنگ ہوجائے۔
