نئی دہلی، 9 اگست (یواین آئی) وزیراعظم نریندر مودی نے اتوار کو تاریخی ‘ہندوستان چھوڑو تحریک’ میں حصہ لینے والے تمام لوگوں کو خراج عقیدت پیش کیا۔ انہوں نے برطانوی نوآبادیاتی حکومت سے ہندستان کی آزادی کی جدوجہد میں ان کی ہمت اور عزم مصمم کو یاد کیا۔ مودی نے سوشل میڈیا پلیٹ فارم ‘ایکس’ پر ایک پوسٹ میں کہا کہ اس تحریک میں شامل لوگوں کی قربانی اور عزم ہندستانیوں کی آنے والی نسلوں کو متاثر کرتا رہے گا۔ وزیراعظم نے کہا، “تاریخی ہندوستان چھوڑو تحریک میں حصہ لینے والے تمام لوگوں کو یاد کرتا ہوں۔ ان کی ہمت ہمیشہ ہر ہندستانی کے لیے مشعل راہ بنی رہے گی۔”تحریک میں مہاتما گاندھی کے کردار کو یاد کرتے ہوئے مسٹر مودی نے کہا، “مہاتما گاندھی جی کی قیادت سے متاثر ہو کر ہندوستان چھوڑو تحریک کے نعرے نے ہماری آزادی کی جدوجہد میں نئی توانائی پیدا کی اور نوآبادیاتی حکومت سے آزاد ہونے کے لیے ہمارے لوگوں کے اٹوٹ عزم کو ظاہر کیا۔”قابل ذکر ہے کہ ‘ہندوستان چھوڑو تحریک’ 8 اگست 1942 کو بامبے میں آل انڈیا کانگریس کمیٹی کی جانب سے ‘ہندوستان چھوڑو’ قرار داد منظور ہونے کے بعد شروع کی گئی تھی۔ اسی دوران گاندھی جی نے “کرو یا مرو” کا تاریخی نعرہ دیا تھا۔
یہ تحریک برطانوی حکومت کے خلاف سب سے بڑی عوامی تحریکوں میں سے ایک تھی۔ نوآبادیاتی حکام کی سخت کارروائی کے باوجود، ملک بھر کے لوگوں نے احتجاجی مظاہروں، ہڑتالوں اور مزاحمتی سرگرمیوں میں حصہ لیا۔تحریک شروع ہونے کے کچھ ہی عرصے بعد برطانوی حکومت نے مہاتما گاندھی جی اور کانگریس کے کئی دیگر سینئر رہنماؤں کو گرفتار کر لیا۔ لیڈران کی گرفتاری کے باوجود، طلبہ، مزدوروں، کسانوں اور عام شہریوں کی بھرپور شرکت سے یہ تحریک جاری رہی۔
