برکس اجلاس کے موقع پرنریندر مودی اور شی جن پنگ کی دو ٹوک بات چیت
بیجنگ: چین کی وزارت خارجہ کا کہنا ہے کہ ہندوستان کے وزیراعظم نریندر مودی اور چینی صدر شی جن پنگ نے برکس سربراہی اجلاس کے موقع پر ملاقات کے دوران موجودہ تعلقات پر دو ٹوک بات چیت کی۔میڈیاکے مطابق چین کی وزارت خارجہ کے ترجمان وانگ وینبن نے ایک بیان میں بتایا ہے کہ صدر شی جن پنگ نے 23 اگست 2023 کو برکس سربراہی اجلاس کے موقع پر ہندوستان وزیراعظم نریندر مودی کے ساتھ بات چیت کی۔بیان میں کہا گیا ہے کہ دونوں قائدین نے موجودہ چین اور ہندوستان کے تعلقات اور مشترکہ دلچسپی کے دیگر معاملات پر دو ٹوک اور گہرائی سے تبادلہ خیال کیا۔صدر شی جن پنگ نے زور دیا کہ چین اور ہندوستان کے تعلقات میں بہتری دونوں ممالک اور عوام کے مشترکہ مفادات کو پورا کرتی ہے اور یہ دنیا اور خطے کے امن، استحکام اور ترقی کے لیے فائدہ مند ہے۔چین کی وزارت خارجہ کی ویب سائٹ پر جاری کیے گئے بیان میں مزید کہا گیا ہے کہ فریقین کو اپنے دوطرفہ تعلقات کے مجموعی مفادات کو مدنظر رکھنا چاہیے اور سرحدی مسئلے کو مناسب طریقے سے حل کرنا چاہیے تاکہ مشترکہ طور پر سرحدی علاقے میں امن و امان کی حفاظت کی جا سکے۔جمعرات کو ہندوستان کے سیکریٹری خارجہ ونے کواترا نے ایک بریفنگ میں بتایا کہ نریندر مودی نے شی جن پنگ سے بات کرتے ہوئے لائن آف ایکچوئل کنٹرول (ایل اے سی) سمیت حل طلب مسائل پر ہندوستان کے خدشات سے آگاہ کیا۔انہوں نے کہا کہ وزیراعظم نے اس بات پر زور دیا کہ سرحدی علاقوں میں امن و امان برقرار رکھنا اور ایل اے سی کا مشاہدہ اور احترام کرنا ہندوستان اور چین کے تعلقات کو معمول پر لانے کے لیے ضروری ہے۔ونے کواترا نے مزید بتایا کہ دونوں قائدین نے اس حوالے سے متعلقہ حکام کو فوری طور پر کشیدگی کم کرنے کی کوششوں کو تیز کرنے کی ہدایت دینے پر اتفاق کیا۔‘جوہری ہتھیاروں سے لیس دونوں ممالک کے تعلقات جون 15 کو لداخ میں ہوئے تنازعہ کے بعد سے کشیدگی کا شکار ہیں، جس میں 20 ہندوستانی فوجی ہلاک ہوئے تھے۔