قانون سازی کیلئے سب کی رضامندی ضروری، پارٹی کے مواصلاتی انچارج جے رام رمیش کا بیان
نئی دہلی، 23 ستمبر(یواین آئی) کانگریس نے کہا ہے کہ بی جے پی حکومت یکساں سول کوڈ (یو سی سی) پر جلد بازی میں ہے اور 2029 کے لوک سبھا انتخابات سے پہلے قومی جمہوری اتحاد (این ڈی اے ) کی حکومت والی تمام ریاستوں میں اسے نافذ کرنا چاہتی ہے ، جبکہ ایسے قانونی اصلاحات وسیع غور و خوض، عوامی بحث اور زیادہ سے زیادہ ممکنہ رضامندی کے ساتھ نافذ کیے جانے چاہئیں۔ کانگریس کے محکمہ مواصلات کے انچارج جے رام رمیش نے چہارشنبہ کو یہاں ایک بیان میں کہا کہ مہاراشٹر میں یو سی سی کا مسودہ تیار کرنے کے لیے تشکیل دی گئی ریاستی حکومت کی کمیٹی سے سپریم کورٹ کے ایک سابق جج نے استعفیٰ دے کر کئی بڑے سوال کھڑے کر دیے ہیں۔ سابق جج نے کمیٹی کے کام کاج پر بھی تشویش ظاہر کی ہے ۔ آئین ساز اسمبلی نے کبھی ایسے حالات کا تصور نہیں کیا تھا جس میں ہر ریاست اپنا الگ یکساں سیول کوڈ بنائے ۔ انہوں نے کہا کہ 17 جون 2016 کو مودی حکومت نے یو سی سی کے سوال کو تفصیلی مطالعہ کے لیے 21 ویں لاء کمیشن کے پاس بھیجا تھا اور وسیع تحقیق کے بعد کمیشن نے 31 اگست 2018 کو اپنے خط میں کہا تھا کہ اس مرحلے پر یو سی سی بنانا نہ تو ضروری ہے اور نہ ہی مناسب۔ کمیشن نے ہندوستان کی قانونی اور ثقافتی تنوع کو برقرار رکھتے ہوئے الگ الگ خاندانی قوانین میں موجود امتیازی سلوک کو دور کرنے کی سفارش کی تھی۔ رمیش نے کہا کہ اس کے باوجود گزشتہ تین سال میں بی جے پی کی حکومت والی ریاستوں نے یو سی سی کے اپنے اپنے ایڈیشن پاس کیے ہیں۔ اتراکھنڈ میں یہ 27 جنوری 2025 سے نافذ ہے ، جبکہ گجرات، آسام اور مدھیہ پردیش کی اسمبلیوں نے بالترتیب 24 مارچ، 27 مئی اور 21 جولائی 2026 کو متعلقہ بل پاس کیے ۔ ان ریاستی سطح کے کوڈز میں الگ الگ دفعات، سزائیں، طریقہ کار اور اہم چھوٹ شامل ہیں۔ کانگریس رہنما نے کہا کہ وزیر داخلہ نے 2029 کے لوک سبھا انتخابات سے پہلے این ڈی اے کی حکومت والی تمام ریاستوں میں یو سی سی نافذ کرنے کا اعلان کیا ہے ۔ رمیش نے کہا کہ اسے مکمل طور پر غور وخوض کے بعد اور عوامی مباحثہ کے ذریعے نیز زیادہ سے زیادہ ممکنہ رضامندی کے ساتھ نافذ کیا جانا چاہیے ۔