جے پور۔ 31 مئی (یو این آئی) راجستھان کی راجدھانی جے پور میں ہوٹل ہالی ڈے ان کو بم سے اڑانے کی دھمکی ملی ہے ۔ موصولہ اطلاعات کے مطابق یہ دھمکی ای میل سے دی گئی ہے اور یہ ملک کے باہر سے آئی ہے جس کی سائبر ماہرین کی جانب سے تحقیقات کی جا رہی ہیں۔ دھمکی ملنے کے بعد پولیس موقع پر پہنچ گئی اور احتیاط کے طور پر ہوٹل کو خالی کرا لیا گیا ہے اور اے ٹی ایس، بم اور ڈاگ اسکواڈ ٹیموں کی مدد سے ہوٹل کی تلاشی لی جا رہی ہے ۔ اس سے قبل کان کنی کے شعبہ سے متعلق فرسٹ انڈیا ٹی وی کے پروگرام کو ہوٹل میں درمیان میں ہی روکنا پڑا تھا اور اس وقت اس پروگرام سے ریاستی وزیر داخلہ جواہر سنگھ بیڑھم خطاب کر رہے تھے ۔ مسٹر بیڑھم نے کہا کہ ایک دھمکی آمیز ای میل آئی ہے ، اس لیے اسے سنجیدگی سے لیتے ہوئے ہمیں اس پروگرام کو روکنا چاہیے اور احاطے کو خالی کرادینا چاہیے ۔ اس کے بعد پروگرام روک دیا گیا اور احاطے کو خالی کر دیا گیا۔ اس وقت ہوٹل میں سرچ آپریشن جاری ہے اور تلاشی مکمل ہونے کے بعد ہی لوگوں کو ہوٹل میں داخل ہونے دیا جائے گا۔
