دبئی: متحدہ عرب امارات کی فضائی کمپنیوں اور ٹریولنگ ایجنسیوں نے علاقائی و بین الاقوامی پروازوں کیلئے خصوصی پیشکشوں کا اعلان کیا ہے۔ الامارات الیوم کے مطابق فضائی کمپنیوں اور ٹریولنگ ایجنسیوں نے نومبر کے آخر تک بین الاقوامی پروازوں کیلئے جو رعایتی ٹکٹ جاری کئے، ان کی ابتدا ایک ہزار 100 درہم سے کی گئی ہے۔ مخصوص ملکوں کیلئے رعایتی پیشکشیں کی جارہی ہیں۔ ٹریولنگ ایجنسیوں کا کہنا ہے کہ ان دنوں فضائی ٹکٹ 30 تا 40 فیصد سستے ہیں۔ اس کا موازنہ موسم گرما کے ٹکٹوں کی قیمتوں سے کیا جارہا ہے۔ فضائی کمپنیوں اور ٹریولنگ ایجنسیوں کا کہنا ہے کہ رعایتی پیشکش سے فائدہ اٹھاتے ہوئے اکتوبر کے آخر تک بکنگ کرائی جاسکتی ہے۔ نومبر کے آخر سے سفر کیا جاسکتا ہے۔الریس کمپنی کے ڈپٹی ایگزیکٹیو چیئرمین محمد الریس نے کہا کہ فضائی ٹکٹ نمایاں حد تک سستے ہوئے ہیں۔
