ناگپور: ہر سال کی طرح اس بار بھی وجے دشمی کے موقع پر راشٹریہ سویم سیوک سنگھ کے اراکین نے ناگپور میں ‘پتھ سنچلن’ کا اہتمام کیا۔ اس موقع پر آر ایس ایس سربراہ موہن بھاگوت بھی موجود تھے۔ گلوکار شنکر مہادیون نے آر ایس ایس کے وجے دشمی تہوار میں بطور مہمان خصوصی شرکت کی۔ گلوکار اور موسیقار شنکر مہادیون نے کہا کہ وہ اس شرکت کو بڑاعزاز سمجھتے ہیں ۔ناگپور کے ریشم باغ گراؤنڈ میں آر ایس ایس کے سالانہ وجے دشمی تقریب میں روایتی اجتماع سے خطاب کرتے ہوئے بھاگوت نے G20 سربراہی اجلاس کی مثال دیتے ہوئے کہا کہ ہر سال بہت سی چیزیں ہوتی ہیں جن پر ہمیں فخر ہوتا ہے۔ بھاگوت نے کہا کہ ہماری قیادت کی وجہ سے آج ہم دنیا میں ایک منفرد مقام رکھتے ہیں۔ بھاگوت نے کہا کہ ہندوستان کی منفرد سوچ اور وڑن کی وجہ سے ہمارا ’واسودھائیو کٹمبکم‘ کا رہنما اصول اب پوری دنیا کے فلسفے میں شامل ہو گیا ہے۔موہن بھاگوت نے کہا کہ چندریان مشن نے بھی ایک زندہ ہندوستان کی طاقت، ذہانت اور چالاکی کا شاندار مظاہرہ کیا۔ ملک کی قیادت ہمارے سائنسدانوں کے سائنسی علم اور تکنیکی مہارت سے جڑی ہوئی ہے۔
