حیدرآباد ۔ 27 ۔ ستمبر (پریس نوٹ) مرکزی رویت ہلال کمیٹی صدر مجلس علماء دکن کا ماہانہ اجلاس بضمن رویت ہلال ماہ ربیع الاول 1444 ھ زیر نگرانی مولانا سید محمدقبول بادشاہ قادری الشطاری معتمد صدر مجلس علماء دکن آج شام خانقاہ کامل مرکزی آستانہ شطاریہ دبیر پورہ میں منعقد ہوا۔ شہر میں مطلع ابر آلود تھا، چاند نظر نہیں آیا۔ واڑی (گلبرگہ شریف) ، گنتکل ، ارولی ، بنگلور، چینائی ، دہلی ، فرحنگی محل لکھنو میں عام رویت کی اطلاعات ملیں۔ لہذا تحت احکام شرعیہ مرکزی رویت ہلال کمیٹی صدر مجلس علماء دکن اعلان کرتی ہے کہ بتاریخ 28 ستمبر 2022 بروز چہارشنبہ یکم ربیع الاول 1444 ھ ہوگی ۔ اس اجلاس میں مولانا سید محمد قبول بادشاہ قادری الشطاری ، مولانا مفتی خلیل احمد ، مولانا سید حسن ابراہیم حسینی سجاد پاشاہ قادری ، مولانا سید اولیاء حسینی مرتضی پاشاہ ، مولانا سید آل مصطفی قادری الموسوی الجیلانی علی پاشاہ ، مولانا سید شیخن احمد شطاری کامل پاشاہ ، مولانا ڈاکٹر سید علی حسینی قادری علی پاشاہ ، مولانا مفتی سید صغیر احمد نقشبندی ، مولانا مشہود احمد (جامعہ نظامیہ) اور قاضی سید نوراللہ فاروق عارفی نے شرکت کی۔
شیعہ علماء کا بیان
سید علی اصغر جعفری کی اطلاع کے مطابق کل ہند شیعہ مجلس علماء و ذاکرین نے اعلان کیا ہے کہ ہندوستان میں کئی مقامات پر چاند نظر آگیا، لہذا 28 ستمبر 2022 ء بروز چہارشنبہ یکم ربیع الاول 1444 ھ ہوگی۔ اس کی تصدیق حسب ذیل علماء کرام نے کی ہے ۔ مولانا ڈاکٹر سید نثار حسین حیدر آقا، مولانا رضا عباس خاں اور مولانا سید جواد عابدی۔
