حیدرآباد 17دسمبر(یواین آئی) تلنگانہ کے کریم نگر ضلع سے پہلی مرتبہ آئی پی ایل کرکٹ میچ کے لئے پی امن راؤکا انتخاب ہوا ہے ۔ امن راؤ نے پہلے ہی حیدرآباد کرکٹ اسوسی ایشن کی جانب سے انڈر19 اور انڈر23 مقابلوں میں شاندار صلاحیتوں کا مظاہرہ کیا ہے ۔ انڈر 23 مشتاق علی کرکٹ ٹورنمنٹ میں امن راؤ نے160 کے اسٹرائیک ریٹ کے ساتھ شاندار کارکردگی دکھاتے ہوئے250 سے زائد رنز اسکور کئے ہیں۔اس بات کی امید کی جارہی ہے کہ آئی پی ایل میں منتخب ہونے کے بعد امن راؤ راجستھان رائلس ٹیم کی جانب سے شاندار کھیل پیش کریں گے اور کریم نگر ضلع کے ساتھ ساتھ تلنگانہ ریاست کا نام روشن کریں گے ۔کریم نگر ضلع کے عوام کی جانب سے امن راؤ کو آئی پی ایل میچوں میں بہترین کارکردگی کے لئے نیک تمنائیں ظاہر کی گئیں اور مبارکباد پیش کی گئی۔