تمام ضروری مراحل کومقررہ مدت میںحل کیا جائے ۔ ضلع کلکٹرنظام آباد وی کرشنا کی ہدایت
نظام آباد: 26؍ نومبر (سیاست ڈسٹرکٹ نیوز) ضلع میں گرام پنچایت کے سرپنچ اور وارڈ ممبر عہدوں کے انتخابات کے سلسلے میں انتظامات کو مکمل چوکسی کے ساتھ انجام دینے کی تیاریوں پر ضلع انتظامیہ نے رفتار تیز کر دی ہے۔ کلکٹر ٹی ونئے کرشنا ریڈی نے عہدیداروں کو واضح ہدایت دی کہ تمام سرگرمیوں کو قواعد و ضوابط کے مطابق اس طرح منظم کیا جائے کہ انتخابی عمل کے دوران کسی بھی مرحلے پر بے قاعدگی یا تنازعہ کی کوئی گنجائش باقی نہ رہے اور عوام کو پرسکون اور منصفانہ ماحول میسر آئے ۔ ضلع کلکٹر مسٹر ونئے کرشنا ریڈی کلکٹریٹ کے دفاتر کے احاطے سے ڈویژنل لکھ پال آفیسرز، ایم پی ڈی اوز اور ڈی ایل پی اوز کے ساتھ ویڈیو کانفرنس کے ذریعے انتخابی تیاریوں کا تفصیلی جائزہ لیا۔ انہوں نے کہا کہ پنچایت انتخابات کے انتظام سے متعلق تمام ضروری مراحل کو مقررہ مدت میں مکمل کیا جائے اور قواعد کے مکمل فہم کے ساتھ ذمہ داریاں ادا کی جائیں۔ انہوں نے ہدایت دی کہ عہدیدار باہمی رابطہ اور موثر ہم آہنگی کے ساتھ کام کرتے ہوئے انتخابی ضابطہ اخلاق کے نفاذ کو یقینی بنائیں، سیاسی جماعتوں کے ہورڈنگس اور پوسٹرس کو ضابطہ نافذ ہوتے ہی فوری ہٹا دیں اور کسی بھی گوشے میں غفلت یا سستی کا مظاہرہ نہ ہونے پائے۔ کلکٹر مسٹر ونئے کرشنا ریڈی نے کہا کہ ووٹروں کو متاثر کرنے کی کسی بھی کوشش کو بروقت روکنا، شراب، رقم یا دیگر ترغیبات کی تقسیم پر سخت نگرانی رکھنا اور ووٹر لسٹ کی ازسرنو تفصیلی طور پر جانچ کرنا ناگزیر ہے۔ اسی طرح انتخابی عملے کو پوری ذمہ داری کے ساتھ مقرر کرتے ہوئے مناسب تربیتی نشستیں منعقد کی گئی ہیں تاکہ ہر مرحلہ شفافیت کے ساتھ مکمل ہو۔ انہوں نے ہدایت دی کہ بیالٹ بکس اور دیگر انتخابی سامان کی صحیح جانچ کے ساتھ پولنگ مراکز کا میدانی معائنہ کرتے ہوئے پینے کے پانی، بیت الخلا، فرنیچر، برقی سہولت اور روشنی جیسی بنیادی ضرورتوں کا اہتمام بلا تاخیر کیا جائے، سرپنچ و وارڈ محفوظ نشستوں کی فہرست کو دوبارہ تصدیق کیا جائے اور نامزدگی کے تمام مراحل ریاستی الیکشن کمیشن کی ہدایات کے مطابق شفافیت اور ذمہ داری کے ساتھ انجام دیے جائیں۔ کلکٹر نے یہ بھی کہا کہ انتخابی ضابطہ کی خلاف ورزیوں یا دیگر شکایات کو مقررہ مدت میں حل کرنا لازمی ہے تاکہ مجموعی انتخابی عمل پر اعتماد مضبوط رہے۔ ویڈیو کانفرنس میں ایڈیشنل کلکٹر انکت، کرن کمار، بودھن اور آرمور سب کلکٹر وکاس مہتو، ابھیگیان مالویا، زیڈ پی سی ای او سایا گوڑ، ضلع پنچایت آفیسر سرینواس راؤ، نوڈل عہدیدار اور ڈی ایل پی اوز بھی موجود تھے اس سے قبل کلکٹر ٹی ونئے کرشنا ریڈی نے بودھن ایم پی ڈی او آفس کا اچانک دورہ کرتے ہوئے گرام پنچایت انتخابات کی زمینی تیاریوں کا معائنہ کیا اور ایم پی ڈی او کیشور کمار سے تفصیلات حاصل کی۔