سورت : ہفتہ کو گجرات کے ضلع سورت میں نامعلوم افراد نے مبینہ طور پر فش پلیٹیں ہٹا دیں۔ ریلوے ٹریک کے ساتھ چھیڑ چھاڑ کرکے ٹرین کو پٹری سے اتارنے کی سازش کے تحت کئی پیچ ڈھیلے کر دیئے۔ حکام نے بتایا کہ ٹرین کے کوسمبا اور کم ریلوے اسٹیشنوں کے درمیان متاثرہ ٹریک سے گزرنے سے پہلے ہی ایک لائن مین نے صبح سویرے اس خلل کو محسوس کیا اور ریلوے حکام کو مطلع کیا جس کی وجہ سے چھیڑ چھاڑ کی کوشش کا پتہ چلا۔ سورت کے سپرنٹنڈنٹ آف پولیس ہتیش زوئیسر نے کہا کہ نامعلوم افراد نے ریلوے ٹریک پر دو پٹریوں کے سروں پر دو ‘فش پلیٹیں ہٹا کر برابر کی پٹری پر رکھ دیں۔ زوئیسر نے اطلاع دی کہ اس نے 40-50 پیچ بھی ڈھیلے کر دیئے ۔ ڈپٹی سپرنٹنڈنٹ آف پولیس آرآر سرویا نے بتایا کہ صبح تقریباً 5.30 بجے پٹریوں کا معائنہ کرنے والے ایک لائن مین کو اس بے ضابطگی کا علم ہوا اور ریلوے انتظامیہ کو آگاہ کیا۔
انہوں نے کہا کہ ریلوے انجینئرز اور دیگر عملہ جائے وقوعہ پر پہنچے اور لائن کی مرمت کی، جس کے بعد ٹرینوں کی آمد و رفت بحال ہوئی۔
