آگرہ: مالدیپ کے صدر محمد معزو اور ان کی بیگم ساجدہ محمد نے منگل کو تاریخی تاج محل کا دورہ کیا اور 17ویں صدی کے فن تعمیر کی اس حیرت انگیز مثال سے مسحور ہوئے۔ معزو جو اپنے چار روزہ دو طرفہ دورہ پر ہندوستان میں ہیں، نے وزیٹر کی کتاب میں لکھا کہ اس مقبرے کی خوبصورتی کو بیان کرنا مشکل ہے۔ یہ مسحور کن ورثہ بہترین محبت اور فن تعمیر کا ثبوت ہے۔ یو پی کے وزیر اعلیٰ یوگی آدتیہ ناتھ کی جانب سے وزیر مملکت یوگیندر اپادھیائے نے آگرہ ایئرپورٹ پر معزو کا استقبال کیا اور اس کے بعد تاج محل میں ان کا شاندار استقبال بھی کیا گیا۔ اپادھیائے نے معزو اور ان کی اہلیہ کو تاج محل کا ماڈل (ریپلیکا) پیش کیا۔ دونوں مہمانوں نے تاج محل کو اپنے پہلو میں رکھ کر تصاویر بھی کھنچوائیں۔ آرکیالوجیکل سروے آف انڈیا (اے ایس آئی) کے ایک اہلکار نے بتایا کہ تاج محل معزو کے دورہ کے دوران صبح 8 بجے سے صبح 10 بجے تک عوام کے لیے بند رہا۔
