کٹھمنڈو، 28 اگست (یو این آئی) نیپال کے دارالحکومت کھٹمنڈو کے حکام کے مطابق گلیشیئر کا ایک بڑا حصہ ٹوٹنے کے بعد مٹی اور چٹانوں کا ایک وسیع تودہ ہمالیائی دریا میں جا گرا، جس کے نتیجے میں آنے والے تباہ کن سیلاب سے نیپال اور چین کے تبت کے علاقے میں کم از کم 469 افراد ہلاک اور کم از کم 1,500 افراد لاپتہ ہیں۔ تباہ کن بھوٹی کوشی سیلاب نے نیپال اور تبت کے پہاڑی سرحدی علاقے کو اپنی زد میں لے لیا، جبکہ نیپال کے ضلع راسووا میں سب سے زیادہ تباہی ہوئی، جو چینی سرحد کے عین جنوب میں واقع ہے ۔ ٹیلی ویژن پر نشر ہونے والی تصاویر میں تباہ شدہ مکانات، پانی میں بہتی گاڑیاں اور سیلابی ریلے میں بہہ جانے والا ایک دھاتی پل دکھائی دیا، جبکہ عینی شاہدین نے بتایا کہ سیلابی پانی نے پورے کے پورے دیہات کو اپنی زد میں لے لیا۔ امدادی اور تلاش کرنے والی ٹیمیں متاثرہ علاقے میں پانی میں چلتے ہوئے متاثرین اور لاپتہ افراد کو تلاش کر رہی ہیں، تاہم کارروائیوں میں شدید مشکلات پیش آ رہی ہیں کیونکہ سیلاب کے باعث متعدد سڑکیں اور پل بھی تباہ ہو گئے ہیں۔ حکام نے ابتدائی طور پر خیال ظاہر کیا تھا کہ بدھ کی صبح آنے والے سیلاب کی وجہ 4.4 شدت کا زلزلہ ہو سکتا ہے ۔ تاہم متعدد ماہرین اور امریکی جیولوجیکل سروے (یو ایس جی ایس) نے تصدیق کی کہ ”زلزلاتی سرگرمی” دراصل گلیشیئر کے ٹوٹنے اور ملبے کے بہاؤ کا نتیجہ تھی، جس کے بعد دریا کے نچلے علاقوں میں تباہ کن اثرات مرتب ہوئے ، نہ کہ زلزلے کی وجہ سے سیلاب آیا۔ گلیشیئر کا انہدام اس وقت ہوتا ہے جب برفانی تودے کا ایک بڑا حصہ اپنے بستر سے الگ ہو جاتا ہے ۔ اس میں بعض اوقات لاکھوں مکعب میٹر برف، چٹانیں اور پانی شامل ہوتے ہیں، جو انتہائی تیزی سے حرکت کرنے والے برفانی تودے یا ملبے کے بہاؤ میں تبدیل ہو سکتے ہیں۔
نیپال سیلاب : ناگپور کے 106 افراد محفوظ
ناگپور، 28 اگست (یواین آئی) مہاراشٹر کے ناگپور سے تعلق رکھنے والے 106 افراد نیپال میں اچانک آنے والے سیلاب کے دوران محفوظ ہیں۔ انہوں نے کھٹمنڈو کے پشوپتی ناتھ مندر کے علاقے میں پناہ لے رکھی ہے ۔حکام نے بتایا کہ یہ گروپ نیپال کے مختلف حصوں میں آنے والے شدید سیلاب کے بعد وہاں پھنس گیا تھا۔ سیلاب کے باعث آمدورفت اور مواصلاتی نظام متاثر ہوا ہے ۔ دیویندر فڑنویس نے اہل خانہ کی اپیل کے بعد مداخلت کرتے ہوئے ان کی بحفاظت واپسی کے لیے متعلقہ حکام کے ساتھ رابطہ اور تال میل قائم کیا۔حکام نے بتایا کہ ناگپور کے پھنسے ہوئے افراد نے اس کے بعد مقامی حکام اور ہنگامی امدادی ٹیموں کی نگرانی میں اپنے گھروں کو واپسی کا سفر شروع کر دیا ہے ۔