ٹرمپ کا دعویٰ، یوکرین جنگ ختم کرنے کیلئے تیار ہیں پوتن

   

واشنگٹن، 20 نومبر (یو این آئی) امریکی صدر ڈونالڈ ٹرمپ نے یورپی رہنماؤں سے کہا ہے کہ روسی صدر ولادیمیر پوتن یوکرین میں جنگ ختم کرنا چاہتے ہیں اور معاہدے کیلئے تیار ہیں۔ امریکہ اب یورپ کو روس کے ساتھ بات چیت میں براہِ راست شامل کرنے کی کوشش کر رہا ہے ۔ خبر رساں ویب سائٹ ایکسیوس کی رپورٹ کے مطابق ٹرمپ نے جمعرات کو ایئر فورس ون طیارے سے فون پر یورپی رہنماؤں سے بات کی۔ اس وقت ان کے خصوصی ایلچی اسٹیو وٹکوف اور جیرڈ کشنر برلن میں یورپی رہنماؤں اور یوکرین کے صدر ولادیمیر زیلنسکی کے ساتھ میٹنگ کر رہے تھے ۔ ٹرمپ نے کہا کہ پوتن معاہدہ کرنے کے خواہشمند ہیں۔ میٹنگ میں موجود افراد کے حوالے سے رپورٹ میں ٹرمپ کے بیان کا ذکر کرتے ہوئے کہا گیا، پوتن جنگ ختم کرنا چاہتے ہیں۔ وہ معاہدہ چاہتے ہیں اور اب اس سے تھک چکے ہیں۔ ٹرمپ نے اس سے قبل دن میں چین کے صدر شی جن پنگ کے ساتھ چین کے شہر شینزین میں ہونے والے غیر معمولی سہ فریقی سربراہ اجلاس کے حاشیے پر پوتن سے ملاقات کی تھی۔ دونوں رہنماؤں کی یہ دو طرفہ ملاقات پہلے سے طے شدہ نہیں تھی، لیکن ایک امریکی عہدیدار نے بتایا کہ ٹرمپ یوکرین تنازعہ ختم کرنے کی کوششوں پر براہِ راست روسی صدر سے بات چیت کرنا چاہتے تھے ۔ پوتن کے انتظار کر رہے کمرے میں داخل ہوتے ہوئے ٹرمپ نے کہا کہ وہ کون ہیں؟ وہ میرے دوست ہیں۔ امریکی صدر نے چین کے صدر شی جن پنگ کے ساتھ الگ سے ہونے والی دو طرفہ ملاقات میں بھی یوکرین تنازعہ کا معاملہ اٹھایا اور جنگ ختم کرانے میں چین سے مدد مانگی۔ بعد میں کشنر نے کہا کہ ٹرمپ نے دونوں رہنماؤں کو امن قائم کرنے کی اپنی خواہش کے بارے میں واضح پیغام دیا ہے اور اس کوشش میں انہیں فعال طور پر شامل کرنا چاہتے ہیں۔ برلن میں وٹکوف اور کشنر نے یورپی رہنماؤں کو یقین دلانے کی کوشش کی کہ ٹرمپ ان کی شرکت کے بغیر پوتن کے ساتھ کسی معاہدے پر بات چیت کرنے کا منصوبہ نہیں بنا رہے ہیں۔ کشنر نے کہاکہ صدر ٹرمپ یورپ کو ساتھ لے کر معاہدہ کرنا چاہتے ہیں۔ ان کا یکطرفہ طور پر کوئی معاہدہ تھوپنے کا ارادہ نہیں ہے۔ ٹرمپ جب فون کے ذریعے میٹنگ میں شامل ہوئے تو انہوں نے جرمنی کے چانسلر فریڈرک مرز سے پوتن کے ساتھ براہِ راست بات چیت کرنے کی اپیل کی۔ انہوں نے کہا کہ فریڈرک، آپ پوتن کو فون کر سکتے ہیں اور اس سے معاہدے کا راستہ نکل سکتا ہے ۔ انہوں نے کہا کہ جن پنگ یوکرین کے صدر ولادیمیر زیلنسکی کا احترام کرتے ہیں۔
پوتن معاہدے کیلئے تیار ہیں۔ زیلنسکی بھی ایک بڑا معاہدہ کر سکتے ہیں۔ ایک یورپی عہدیدار نے برلن میں ہونے والی بات چیت کو اہم قرار دیا اور کہا کہ امریکہ اور یورپی ممالک کے دارالحکومتوں کے درمیان اچھا تال میل تھا۔ انہوں نے اس کا موازنہ شینزین میں ہونے والے کافی حد تک علامتی سربراہ اجلاس سے کیا۔ امریکہ کے فوری مقاصد میں سے ایک روس اور یوکرین کے درمیان بات چیت میں یورپ کے براہِ راست کردار کو یقینی بنانا ہے ۔ امریکی حکام یہ بھی چاہتے ہیں کہ یورپی حکومتیں ایک نئے یورپ-روس سیکیورٹی معاہدے کے حوالے سے ماسکو کے ساتھ بات چیت کریں۔ پوتن نے جمعرات کو کہا کہ روس یوکرین پر ہونے والی بات چیت میں یورپ کی شرکت کیلئے تیار ہے ۔ انہوں نے دلیل دی کہ سلامتی سے جڑے مسائل، بالخصوص یورپ کو متاثر کرنے والے معاملات پر اس براعظم کی شرکت کے بغیر تبادلہ خیال نہیں کیا جا سکتا۔ انہوں نے کہا کہ روس یہ سمجھنا چاہتا ہے کہ یورپی حکومتیں بات چیت میں کیا کردار ادا کرنے کیلئے تیار ہیں۔ پوتن نے یہ اشارہ بھی دیا کہ روس یورپ کے ساتھ سیکیورٹی معاہدے کی ایک نئی تجویز پیش کر سکتا ہے ۔ انہوں نے کہا کہ 1990 کی دہائی کے بعد سے جغرافیائی سیاسی حالات میں تبدیلی آئی ہے ۔ برلن میں پہلی میٹنگ کے بعد وٹکوف اور کشنر نے زیلنسکی اور جرمنی، برطانیہ، فرانس، اٹلی اور پولینڈ کے قومی سلامتی کے مشیروں کے ساتھ مزید بات چیت کی۔ اس میٹنگ میں یورپی یونین (ای یو) اور شمالی بحر اوقیانوس کی تنظیم (نیٹو) کے اعلیٰ حکام بھی شامل ہوئے ۔ ان مذاکرات کا مقصد اگلے ہفتے روس کے ساتھ ممکنہ بات چیت کے ایک اور دور سے قبل تمام فریقین کے موقف میں ہم آہنگی پیدا کرنا تھا۔ تاہم، ایک یورپی عہدیدار نے کہا کہ اس بات کو لے کر ابھی بھی شبہ ہے کہ آیا ماسکو واقعی یورپی ممالک کی حکومتوں کو امن مذاکرات میں شامل ہونے کی اجازت دے گا۔ کشنر نے کہا کہ امریکہ روس کو یہ پیغام دے گا کہ یورپ متحد ہے اور یوکرین کی حمایت کرنے کیلئے پرعزم ہے ۔ اس کے ساتھ ہی وہ امن کی بھی خواہش رکھتا ہے ۔ انہوں نے کہا کہ ہم روس کو یہ بھی بتائیں گے کہ ہم یورپ میں عزم، اتحاد اور وابستگی دیکھتے ہیں، لیکن ساتھ ہی امن کی حقیقی خواہش بھی دیکھتے ہیں۔