غزہ سٹی : اسرائیل اور حماس کے درمیان معاہدے کے تحت غزہ کے لیے ادویات اور دیگر امداد کا آغاز کر دیا گیا ہے۔ قطری امور خارجہ کے ترجمان ماجد الانصاری نے سوشل میڈیا ایکس پر اس حوالے سے پوسٹ جاری کی ہے۔ انصاری نے پوسٹ میں بتایا کہ اسرائیلی یرغمالیوں سمیت غزہ کی پٹی کے عام شہریوں کی خاطر ایک معاہدے کے نتیجے میں ادویات اور دیگر انسانی امداد غزہ روانہ کر دی گئی ہے۔ گزشتہ روز قطر نے بتایا تھا کہ اسرائیل اور حماس کے درمیان ایک معاہدے کے تحت عام شہریوں کے لیے ادویات اور انسان امداد روانہ کی جائے گی یہ معاہدہ غزہ میں موجود اسرائیلی یرغمالیوں کو در پیش طبی ضروریات کے نتیجے میں کیا گیا ہے۔اسرائیلی فوج کے مطابق، غزہ میں اس وقت 136 اسرائیلی اسیر موجود ہیں۔یاد رہے کہ قطر اور مصرکی کوششوں سے غزہ کی جھڑپوں میں 24 نومبر کو 4 روز کیلیے وقفہ دیا گیا تھا جس میں مزید 3 دن کی توسیع کی گئی تھی جس کے دوران 81 اسرائیلی اور 240 فلسطینی اسیر رہا کئے گئے تھے۔
