نئی دہلی۔9 نومبر (سیاست ڈاٹ کام ) کنگز الیون پنجاب کے ساتھ معاہدہ ٹوٹنے کے ٹھیک بعد تجربہ کار آف اسپنر روی چندرن اشون نے دہلی کیپٹلس کا دامن تھام لیا ہے جو انڈین پریمیئر لیگ کے 2020 سیزن میں ٹیم کا حصہ بنیں گے۔اشون کو دہلی نے کھلاڑیوں کے ٹریڈ میں اپنی ٹیم میں شامل کیا ہے جبکہ بائیں ہاتھ کے اسپنر جگدیش سچت کو ریلیزکر دیا ہے۔دہلی کیپٹلس کے شریک مالک پارتھ جندل نے کہاکہ میں سچت کو نیک خواہشات دیتا ہوں اور مجھے یقین ہے کہ نئی ٹیم میں وہ اچھا مظاہرہ کرے گا۔ میں پورے دل سے دہلی کیپٹلس پریوار میں اشون کو شامل کرتا ہوں۔ وہ ایک بہترین اسپنر ہیں اور ان کے پاس ہندستان اور آئی پی ایل میں کھیلنے کا بہترین تجربہ ہے۔ ہمیں یقین ہے کہ ان کی موجودگی سے ہمیں فائدہ ملے گا۔ دہلی کے چیف کوچ رکی پونٹنگ نے خوشی کا اظہار کرتے ہوئے کہاکہ اشون کسی بھی ٹیم میں جائیں وہ اہم کھلاڑی ہیں۔
