گروپتونت سنگھ پنون کو قتل کرنے کی سازش کے الزامات کی تحقیقاتی کمیٹی کی رپورٹ
نئی دہلی:وزارت خارجہ نے گزشتہ اکتوبر میں اس بات کی تصدیق کی تھی کہ سی آر پی ایف کے ایک سابق افسر یادو کو حکومت نے برطرف کر دیا تھا۔خالصتان کے حامی علیحدگی پسند گروپتونت سنگھ پنون کو امریکی سرزمین پر قتل کرنے کی سازش کے الزامات کی تحقیقات کے لیے ہندوستانی حکومت کی طرف سے تشکیل دی گئی ایک انکوائری کمیٹی نے ایک ایسے فرد کے خلاف قانونی کارروائی کی سفارش کی ہے جس کے مجرمانہ روابط اور واقعات پہلے منظر عام پر آئے تھے، مرکزی وزارت داخلہ نے چہارشنبہ کویہ اعلان کیا۔اس کمیٹی نے جس کی سربراہی قومی سلامتی کونسل کے ایک سینئر اہلکار کر رہے تھے نے ہندوستان کے ردعمل کو مضبوط بنانے اور اس طرح کے معاملات سے نمٹنے کیلئے منظم کنٹرول کو یقینی بنانے کے لیے طریقہ کار اور اقدامات میں فعال بہتری کی بھی سفارش کی۔وزارت داخلہ کے بیان میں اس فرد کا نام نہیں لیا گیا جس کے خلاف کمیٹی نے قانونی کارروائی کی سفارش کی تھی یا سکھ فار جسٹس (SFJ) کے رہنما پنن کو قتل کرنے کی مبینہ سازش کا حوالہ دیا گیا۔ لیکن پیش رفت سے واقف لوگوں نے نام ظاہر نہ کرنے کی شرط پر بتایا کہ یہ شخص وکاس یادو ہے جسے امریکی محکمہ انصاف نے اکتوبر 2024 میں ہندوستانی اہلکار کے طور پر نامزد کیا تھا جس نے مبینہ طور پر پنن کو قتل کرنے کی سازش کی ہدایت دی تھی۔وزارت خارجہ نے گزشتہ اکتوبر میں اس بات کی تصدیق کی تھی کہ یادو، سنٹرل ریزرو پولیس فورس (سی آر پی ایف) کا ایک سابق افسر ہے جو کہ ریسرچ اینڈ انالیسس ونگ(را) میں تعینات تھے جس کو حکومت نے برطرف کر دیا تھا۔وزارت داخلہ نے اپنے بیان میں کہاکہ طویل تفتیش کے بعد کمیٹی نے اپنی رپورٹ حکومت کو پیش کی ہے اور ایک ایسے فرد کے خلاف قانونی کارروائی کی سفارش کی ہے جس کے سابقہ مجرمانہ روابط اور واقعات بھی انکوائری کے دوران سامنے آئے تھے۔وزارت نے کہا کہ امریکہ کی جانب سے بعض منظم جرائم پیشہ گروہوں اور دہشت گرد تنظیموں کے بارے میں معلومات فراہم کرنے کے بعد نومبر 2023 میں قائم کی گئی اعلیٰ اختیاری کمیٹی نے اپنی رپورٹ حکومت کو پیش کر دی تھی۔ پنون کو جولائی 2020 میں دہشت گرد قرار دیا گیا تھا۔کمیٹی کی رپورٹ کے پیش کرنے اور حکومت کی جانب سے اسے عام کرنے کا وقت اہم ہے۔ یہ جو بائیڈن انتظامیہ کے عہدہ چھوڑنے کی تیاری سے کچھ دن پہلے اور امریکی قومی سلامتی کے مشیر جیک سلیوان کے نئی دہلی کے دورے کے 10 دن بعد سامنے آئی ہے۔ وزارت داخلہ کے بیان میں اشارہ دیا گیا کہ حکومت کا خیال ہے کہ یہ واقعہ ایک بدمعاش اہلکار کی طرف سے ترتیب دیا گیا تھا۔ یادو کو اس کے عہدے سے ہٹا دیا گیا تھا جب نومبر 2023 میں مین ہٹن کی ایک عدالت میں امریکی پراسیکیوٹرز کی طرف سے دائر فرد جرم میں اس کا نام لیے بغیر مبینہ سازش میں ان کے کردار کی طرف اشارہ کیا گیا تھا۔اکتوبر 2024 میںمیڈیا نے پہلی بار، ایک امریکی اہلکار کے ان پٹ کی بنیاد پر اطلاع دی تھی کہ ہندوستان نے امریکہ کو بتایا تھا کہ ملوث اہلکار اب حکومت ہند کے زیرِ ملازمت نہیں رہا۔ اس کے بعد وزارت خارجہ نے بھی اس کی تصدیق کی۔ وزارت خارجی امور کی تصدیق کے چند دنوں کے اندر، یادو کو اسی عدالت میں دائر دوسرے فرد جرم میں نامزد کیا گیااور تجویزپیش کی گئی کہ دونوں حکومتیں اس معاملے پر قریبی رابطے میں ہیں اور واشنگٹن ڈی سی اور نئی دہلی میں ایک واضح اقدام تھا کہ یادو پر رسمی طور پر الزام عائد کرنے سے پہلے ہندوستانی حکومت کو عوامی طور پر دور کیا جائے۔