واشنگٹن : سعودی عرب کے نائب وزیردفاع شہزادہ خالد بن سلمان نے واشنگٹن میں امریکی وزیردفاع لائیڈ آسٹن ،جائنٹ چیفس آف اسٹاف جنرل مارک مِلر اور دوسرے اعلیٰ عہدے داروں سے ملاقات کی ہے اور ان سے دونوں ملکوں کے درمیان مختلف شعبوں میں دوطرفہ تعلقات کے فروغ کے بارے میں تبادلہ خیال کیا ہے۔امریکی عہدے داروں نے اپنے ملک کی جانب سے سعودی عرب کے حق دفاع کی مکمل حمایت کا اعادہ کیا ہے۔جنوری میں ڈیموکریٹک جوبائیڈن کے منصب صدارت سنبھالنے کے بعد سعودی عرب کے کسی اعلیٰ عہدہ دار کا واشنگٹن کا یہ پہلا دورہ ہے۔وائٹ ہاؤس کی پریس سیکریٹری جین ساکی نے بتایا ہیکہ شہزادہ خالد نے قومی سلامتی کے مشیر جیک سلیوان سے بھی ملاقات کی ہے اور ان سے خطے میں ایران کی تخریبی سرگرمیوں سمیت مختلف امور پر بات چیت کی ہے۔ پینٹاگان کے پریس سیکریٹری جان کربی نے الگ سے ایک بیان میں کہا ہیکہ امریکی وزیردفاع لائیڈ آسٹن اور جائنٹ چیفس آف اسٹاف جنرل مارک مِلر نے شہزادہ خالد سے گفتگو میں سرحدپارحملوں کے مقابلے میں سعودی عرب کی علاقائی سالمیت اور خودمختاری کے حقِ دفاع کی حمایت کا اعادہ کیا ہے۔یمن سے ایران کے حمایت یافتہ حوثی شیعہ باغی سعودی عرب کے جنوب میں واقع شہروں اور شہری تنصیبات کو روزانہ ہی ڈرون اور میزائل حملوں میں نشانہ بنانے کی کوشش کر رہے ہیں لیکن سعودی عرب کا فضائی دفاعی نظام حوثیوں کے ان حملوں کومسلسل ناکام بنا رہا ہے۔
