بنگلورو، 12 جولائی (یو این آئی) الیکشن کمیشن آف انڈیا (ای سی آئی) نے واضح کیا ہے کہ جن ووٹروں کے نام پہلے سے موجود انتخابی فہرست (الیکٹورل رول) میں درج ہیں، انہیں جاری خصوصی جامع نظرثانی (ایس آئی آر) کے دوران کوئی اضافی دستاویز جمع کرانے کی ضرورت نہیں ہوگی۔یہ وضاحت ایسے وقت میں سامنے آئی ہے جب انتخابی فہرستوں کی نظرثانی کے عمل کے دوران دستاویزات سے متعلق عوامی خدشات ظاہر کیے جا رہے تھے ۔الیکشن کمیشن کے مطابق، جن ووٹروں کے نام پہلے ہی انتخابی فہرست میں شامل ہیں، انہیں صرف اپنی معلومات کی تصدیق کرکے اینیومریشن فارم جمع کرانا ہوگا۔ ایسے ووٹروں سے کسی بھی اضافی دستاویز کا مطالبہ نہیں کیا جائے گا، جب تک کہ ریکارڈ میں کوئی تضاد نہ ہو یا مزید تصدیق کی ضرورت پیش نہ آئے ۔حکام نے بتایا کہ اگر کسی ووٹر کی فراہم کردہ معلومات انتخابی ریکارڈ میں موجود تفصیلات سے مطابقت رکھتی ہیں تو تصدیق کا عمل بغیر کسی اضافی ثبوت کے مکمل کر لیا جائے گا۔ تاہم اگر معلومات میں کوئی اختلاف پایا جائے یا ان کی تصدیق ممکن نہ ہو تو متعلقہ دستاویزات طلب کی جا سکتی ہیں۔الیکشن کمیشن نے ووٹروں سے اپیل کی ہے کہ وہ گھر گھر جا کر تصدیق کرنے والے بوتھ لیول افسران (بی ایل او) کے ساتھ تعاون کریں اور اس بات کو یقینی بنائیں کہ ان کی ذاتی اور خاندانی معلومات درست ہوں۔خصوصی جامع نظرثانی (ایس آئی آر) کا مقصد انتخابی فہرستوں کو تازہ کرنا، ان میں سے نقل اندراجات، فوت شدہ افراد اور نااہل ووٹروں کے نام حذف کرنا اور تمام اہل شہریوں کے نام انتخابی فہرست میں برقرار رکھنا ہے ۔یہ عمل مختلف مراحل میں مکمل کیا جا رہا ہے اور دعووں اور اعتراضات کے ازالے کے بعد حتمی انتخابی فہرست شائع کی جائے گی۔
