ترواننتا پورم: انفورسمنٹ ڈائریکٹوریٹ (ای ڈی) نے دھوکہ دہی کے ایک معاملے میں ڈاکٹر ایس ایم سی ایس آئی میڈیکل کالج کاروکورم کے 95.25 لاکھ روپے کے اثاثوں کو ضبط کرلیا ہے ۔انفورسمنٹ ڈائریکٹوریٹ نے منگل کو ایک پریس ریلیز جاری کرتے ہوئے کہا کہ اس نے ڈاکٹر ایس ایم سی ایس آئی میڈیکل کالج کے بینک اکاؤنٹ میں عارضی طور پر 95.25 لاکھ روپے کے منقولہ اثاثے منسلک کر دیے ہیں، جو ایم بی بی ایس/ پی جی کی نشستوں پر طلباء کو داخلے کے نام پر ان کے والدین سے دھوکہ دے کر حاصل کی گئی رقم ہے ۔ای ڈی کی یہ کارروائی ویلرڈا پولیس اسٹیشن اور کیرالہ کی کرائم برانچ کے ذریعہ درج کئی ایف آئی آر کی بنیاد پر کی گئی ہے ۔ای ڈی نے جانچ میں پایا کہ سی ایس آئی میڈیکل کالج نے داخلہ دینے کے نام پر بچوں کے والدین سے مذکورہ رقم وصول کی لیکن رقم لینے کے بعد بھی طلباء کو داخلہ نہیں دیا۔ مزید یہ کہ مذکورہ رقم کا ایک حصہ کالج کے بنیادی ڈھانچے کی ترقی کے لیے استعمال کیا گیا اور باقی رقم بنیادی ادارے یعنی جنوبی کیرالہ صوبہ (ایس کے ڈی) کو بھیجی گئی۔تحقیقات سے یہ بات بھی سامنے آئی کہ ڈاکٹر بینیٹ ابراہم اور ریو اے دھرم راج نے دھوکہ دے کر کل 95.25 لاکھ روپے حاصل کیے ۔ کالج آف میڈیسن کے ذریعے ڈاکٹر بینیٹ ابراہم اور ریو اے دھرمراج کی طرف سے جمع کرائی گئی رقم ختم ہو گئی تھی اور ضبط کے لیے دستیاب نہیں تھی۔ اس لیے کالج کے بینک اکاؤنٹ سے 95.25 لاکھ روپے کی رقم عارضی طور پر منجمد کی گئی۔
