10 دن میں جامع تحقیقاتی رپورٹ پیش کرنے کی ڈی ایم ایچ اوز کو ہدایت ، غیر مسلمہ ڈاکٹرس اور طبی عملہ پر نظر
حیدرآباد ۔ 22 ۔ ستمبر : ( سیاست نیوز ) : تلنگانہ حکومت ریاست میں بغیر منظوری کے چلائے جانے والے خانگی ہاسپٹلس اور ڈائیگناسٹک سنٹرس کے خلاف کارروائی کرنے کی حکمت عملی تیار کی ہے ۔ چند خانگی ہاسپٹلس ، نرسنگ ہومس ، کلینکس ، کنسلٹیشن رومس ، پالی کلینکس ، ڈائگناسٹک سنٹرس ، فزیوتھراپی یونٹس ، ڈینٹل ہاسپٹلس ایسے ہیں جو تلنگانہ کلینکل اسٹابلشمنٹ ایکٹ کی خلاف ورزی کرتے ہوئے بغیر رجسٹریشن کے چلائے جارہے ہیں ۔ ناگہانی واقعات پیش آنے کے بعد وہ بغیر منظوری کے چلانے کا علم ہورہا ہے ۔ ایسے ہاسپٹلس اور عملہ کے خلاف حکومت کو بڑے پیمانے کی شکایتیں وصول ہورہی ہیں ۔ جس کے بعد بغیر منظوری کے چلائے جانے والے ہاسپٹلس کے خلاف کارروائی کرنے کا حکومت نے فیصلہ کیا ہے ۔ یہی نہیں چند ہاسپٹلس نے قواعد کے مطابق بنیادی سہولتیں بھی فراہم نہیں کی ہے ۔ بالخصوص ( میڈیکل ایکیوپمـنٹ ) طبی آلات ، صاف صفائی ، ہاسپٹلس کے فضلہ کے معاملے میں قوانین پر عمل نہیں کررہے ہیں ۔ یہ تمام شکایتیں محکمہ صحت کو وصول ہورہی ہیں ۔ محکمہ صحت نے ریاست بھر میں بغیر اجازت چلائے جانے والے ہاسپٹلس اور تشخیصی مراکز کا بڑے پیمانے پر معائنہ کرنے کا فیصلہ کیا ہے ۔ اس سلسلہ میں محکمہ صحت عامہ کے ڈائرکٹر ڈاکٹر جی سرینواس راؤ نے ریاست کے تمام ڈی ایم ایچ اوز کو ایک سرکلر جاری کیا ۔ ایسے ہاسپٹلس کا معائنہ کرنے کے لیے خصوصی ٹیمیں تشکیل دینے کا مشورہ دیا ۔ معائنہ کرنے والی ٹیموں میں ڈپٹی ڈی ایم ایچ اوز ، پروگرام آفیسرس کو حصہ بنانے کی ہدایت دی ہے ۔ 10 دن میں تمام ہاسپٹلس ڈائگناسٹک سنٹرس کا معائنہ کرتے ہوئے جامع رپورٹ پیش کرنے کے احکامات جاری کئے ۔ ساتھ ہی کلینکل اسٹابلشمنٹ قانون کے قواعد کی خلاف ورزی کرنے والے ہاسپٹلس ، ڈائیگناسٹک سنٹرس ، ڈاکٹرس ، طبی عملہ کے خلاف سخت سے سخت کارروائی کرنے کی ہدایت دی ۔ ریاست تلنگانہ کے صدر مقام حیدرآباد میں ہزاروں کی تعداد میں ہاسپٹلس ، کلینکس ، نرسنگ ہومس ہیں ۔ اس کے علاوہ 460 سے زائد خانگی ڈائگناسٹک سنٹرس ہیں ۔ اتنے بڑے شہر میں معائنہ کرنے کے لیے صرف 10 دن ناکافی ہونے کی شکایتیں وصول ہورہی ہیں ۔ چند دن قبل حیدرآباد کے اوپل علاقہ میں بغیر کسی مسلمہ حیثیت کے ایک ڈاکٹر نے خانگی ہاسپٹل قائم کیا ۔ وہاں زیر علاج ایک حاملہ خاتون کی موت کے بعد تحقیقات کے دوران یہ حیرت انگیز انکشافات ہوئے ہیں ۔۔ ن
