حیدرآباد23 نومبر(یواین آئی) تلنگانہ میں گروپ 4 کی ملازمتوں کو پُر کرنے کیلئے تیاریاں کی جارہی ہیں۔ گروپ ون پریلمس امتحان ختم ہوگئے ہیں۔ گروپ 2 اور 3 کے عہدوں کو پر کرنے کی اجازت حکومت نے دے دی ہے ۔ محکمہ پنچایت راج میں 1,298 عہدوں کومنظور کرنے کے بعد حکومت گروپ 4 کے عہدوں کو بھرنے کے لیے منظوری دے گی۔حکومت نے ریاست میں 80,039 ملازمتوں کو پُرکرنے کے عمل کو شروع کیا ہے ۔ان میں گروپ ون سمیت مختلف زمروں کی ملازمتیں شامل ہیں۔بعض عہدوں کو پُرکرنے کا عمل آخری مرحلہ میں ہے جبکہ دیگر زمروں کے عہدوں کو پُرکرنے کا عمل مختلف مراحل میں ہے ۔جملہ 80 ہزار سے زائد ملازمتوں میں سے محکمہ فائنانس نے اب تک 52ہزار ملازمتوں کو پُرکرنے کی انتظامی منظوری دیدی ہے ۔ان عہدوں کو پُرکرنے کیلئے تقررات کرنے والے اداروں کو اجازت دینے کے احکام جاری کئے گئے ہیں۔اس کے مطابق ان اداروں نے ملازمتوں کو پُرکرنے کے عمل کو شروع کیا ہے ۔اہم گروپ ون کے عہدوں کو پُرکرنے کے عمل کاکام تلنگانہ پبلک سرویس کمیشن نے شروع کیا ہے ۔ 503گروپ ون عہدوں کو پُرکرنے کیلئے پریلمس امتحان منعقد کیاگیا۔اس کی ابتدائی کی اوراعتراضات کو بھی قبول کیاگیا ہے اور بعد ازاں قطعی ’ کی ‘ بھی جاری کردی گئی۔مینس امتحان کے لئے اہل پائے جانے والے امیدواروں کی فہرست تلنگانہ پبلک سرویس کمیشن کی جانب سے جاری کی گئی۔فروری میں مینس امتحان منعقد کرنے کا منصوبہ کمیشن نے تیار کیا ہے ۔اس سلسلہ میں ریزرویشن اوردیگر امور کو حتمی شکل دیتے ہوئے مینس امتحان کی تاریخ مقرر کی جائے گی۔گروپ 2اورگروپ 3کے عہدوں کو پُرکرنے کے عمل کو بھی کمیشن کی جانب سے شروع کیاجائے گا۔گروپ 2کی 663 اور گروپ 3کی 1373 ملازمتوں کو پُرکرنے کے لئے محکمہ فائنانس کی جانب سے منظوری دی گئی ہے ۔ وزیر فائنانس ہریش راو نے حال ہی میں اعلان کیا ہے کہ جلد ہی گروپ 4اعلامیہ جاری کیاجائے گا۔گروپ 4زمرہ میں 9168 ملازمتیں ہیں۔ان عہدوں کو پُرکرنے کیلئے ریاستی حکومت نے ہنوز اجازت نہیں دی ہے ۔9168عہدوں میں بعض نئے عہدے بھی شامل ہیں۔ریاست میں تشکیل شدہ نئے اضلاع، منڈلوں میں پنچایت راج محکمہ کے دفاتر میں جونیر اسسٹنٹ کے عہدوں کو منظور کیاگیا ہے جس کے لئے محکمہ پنچایت راج کے 1298عہدوں کو پُرکرنے کے اقدامات کئے جارہے ہیں۔اس سلسلہ میں فائل حکومت کے زیرغور ہے ۔اس پر منظوری کے فوری بعد نئے عہدوں کو منظوری دیدی جائے گی۔اس کے بعد ہی گروپ 4کے عہدوں کو پُرکرنے کے لئے محکمہ فائنانس کی جانب سے اجازت دی جائے گی۔ریاستی حکومت کی اجازت کے بعد ان محکمہ جات سے درکارتفصیلات حاصل کرتے ہوئے گروپ 4کے عہدوں کو پُرکرنے کیلئے پبلک سرویس کمیشن کی جانب سے اقدامات کئے جائیں گے ۔توقع ہے کہ گروپ ون مینس امتحان، نتائج، گروپ 2اورگروپ 3کے عہدوں کو پُرکرنے کے شیڈول پر غور کرنے کے بعد گروپ 4کے تقرر کے شیڈول کو جاری کیاجائے گا۔
