نئی دہلی۔ اقتصادی اصلاحات اور ٹیکس چوری کو روکنے کے لیے کیے گئے اقدامات کی وجہ سے جولائی میں جی ایس ٹی کی وصولی 28 فیصد بڑھکر 1.49 لاکھ کروڑ روپے ہوگئی۔ حکومت نے یہ اطلاع دی۔ جولائی 2021 میں گڈز اینڈ سروسز ٹیکس (جی ایس ٹی) کی وصولی 1,16,393 کروڑ روپے تھی۔ وزارت خزانہ نے ایک بیان میں کہا کہ جولائی 2017 میں جی ایس ٹی کے نفاذ کے بعد سے یہ دوسرا سب سے بڑا ماہانہ مجموعہ ہے۔ اس سے پہلے اپریل 2022 میں، مجموعہ 1.68 لاکھ کروڑ روپے کی بلند ترین سطح پر پہنچ گیا تھا۔ وزارت نے کہا کہ یہ چھٹا موقع ہے اور مارچ 2022 کے بعد لگاتار پانچواں مہینہ ہے، جب ماہانہ جی ایس ٹی کی وصولی 1.40 لاکھ کروڑ روپے سے تجاوز کر گئی ہے۔ زیر جائزہ مدت کے دوران سامان کی درآمد سے حاصل ہونے والی آمدنی میں 48 فیصد اضافہ ہوا۔گھریلو لین دین سے حاصل ہونے والی آمدنی (خدمات کی درآمد سمیت) پچھلے سال کے اسی مہینے کے مقابلے میں 22 فیصد زیادہ تھی۔
