نئی دہلی : کانگریس لیڈر راہول گاندھی نے آج کہاکہ لفظ ’لنچنگ‘ عملاً 2014 ء سے قبل سننے میں نہیں آتا تھا۔ بی جے پی برسر اقتدار آنے کے بعد یہ لفظ عام ہوگیا۔ راہول نے ٹوئٹر پر یہ ریمارک کرتے ہوئے وزیراعظم پر طنز کیا اور لکھا : ’’تھینک یو مودی جی‘‘۔ یہ تنقید پنجاب کے امرتسر اور کپورتھلا میں لنچنگ کے حالیہ واقعات کے تناظر میں سوال پر سامنے آئی۔ پنجاب میں کانگریس کا اقتدار ہے۔ راہول نے کہاکہ 2014 ء کے بعد سے لوگ نہ صرف لنچنگ کے لفظ سے مانوس ہوگئے بلکہ کئی جگہ بے قابو ہجوم اس میں ملوث ہورہے ہیں۔
اجے مشرا کو ہٹانا ہی پڑیگا:راہول
نئی دہلی: کانگریس کے سابق صدر راہل گاندھی نے کہا کہ لکھیم پور کھیری میں داخلہ کے مرکزی وزیرمملکت اجے مشرا ’ٹینی‘ کے بیٹے کی جیپ سے کسانوں کو کچلا گیا ہے اس لئے حکومت کو اس بارے میں ملک کے عوام کوجوا ب دینا ہوگا اور مرکزی وزیر کو ہٹانا پڑے گا۔ راہول گاندھی نے منگل کو پارلیمنٹ ہاوس سے وجے چوک تک اپوزیشن کے مارچ کے بعد نامہ نگاروں سے خطا ب کرتے ہوئے کہا کہ اپوزیشن جماعتیں لکھیم پور کھیری کے معاملے کو بار بار اٹھا رہی ہیں۔ حقائق کی بنیاد پر واضح ہے کہ وزیر کے بیٹے نے کسانوں کو مارا ہے اور وزیر کی جیپ کے نیچے انہیں کچلا گیا ہے ۔ اس بارے میں تفتیشی ٹیم کی رپورٹ آئی ہے اور رپورٹ سے واضح ہے کہ ایک سازش کے تحت کسانوں کو جیپ سے کچلنے کا کام ہوا ہے ۔ انہوں نے میڈیا پر بھی اپنا کام صحیح طریقہ سے نہیں کرنے کا الزام لگاتے ہوئے کہا کہ میڈیا توجہ ہٹانے کی کوشش کرتی ہے ۔ آج نہ میڈیا اپنا کام کررہی ہے اور نہ ہی حکومت اپنا کام کررہی ہے ۔ حقیقت یہ ہے کہ ہندستان کے ایک وزیر کے بیٹے نے کسانوں کو جیپ کے نیچے کچلنے کا کام کیا ہے۔
