لکھنؤ، 15 مارچ (یو این آئی) بہوجن سماج پارٹی (بی ایس پی) کی صدر مایاوتی نے پارٹی کے بانی کانشی رام کے یومِ پیدائش پر انہیں خراجِ عقیدت پیش کرتے ہوئے بہوجن سماج سے اپیل کی ہے کہ وہ بی ایس پی تحریک سے جڑ کر ایماندار اور مشنری امبیڈکر وادی بنیں۔انہوں نے کہا کہ بہوجن سماج اپنے ووٹ کی طاقت سے اقتدار کی “ماسٹر کی” حاصل کر سکتی ہے ، جس سے آئین میں دیئے گئے حقوق کو زمین پر نافذ کیا جا سکے ۔ انہوں نے کہا کہ یہی کانشی رام کا مشن اور ان کی زندگی کا پیغام بھی ہے ۔محترمہ مایاوتی نے اتوار کو ‘ایکس’ پر جاری پیغام میں کہا کہ محترمہ کانشی رام نے اپنی پوری زندگی بہوجن سماج کے حقوق اور وقار کے لیے وقف کر دی تھی۔انہوں نے کہا کہ کانشی رام نے ڈاکٹر امبیڈکر کی سوچ اور تحریک کو آگے بڑھاتے ہوئے ملک بھر میں بہوجن سماج کو منظم کیا۔ انہوں نے ذات پات کی بنیاد پر نظر انداز کیے گئے اور پسماندہ لوگوں کو متحد کر کے انہیں سماجی اور سیاسی طور پر مضبوط بنانے کا کام کیا۔ ان کی قیادت میں بہوجن سماج پارٹی نے “سماجی تبدیلی اور معاشی آزادی” کے مشن کو آگے بڑھایا۔بی ایس پی سپریمو نے کہا کہ کانشی رام کی تاریخی کوششوں کی وجہ سے بہوجن سماج میں سیاسی بیداری آئی اور سماج کے لوگوں کو اپنے حقوق کے لیے جدوجہد کرنے کی ترغیب ملی۔ مایاوتی نے پارٹی کارکنوں اور حامیوں کا شکریہ ادا کرتے ہوئے کہا کہ وہ کانشی رام کے خیالات اور مشن کو آگے بڑھانے کے لیے مسلسل کوشاں ہیں۔
