طرابلس : لیبیا کی مشرقی حکومت کے ساتھ مل کر کام کرنے والی سیکیورٹی فورسز نے ہفتے کے روز سرحدی قصبے امسا کے قریب مختلف ممالک سے تعلق رکھنے والے تقریباً 570 غیر قانونی تارکین اور کئی مشتبہ انسانی اسمگلروں کو گرفتار کیا۔ یہ اطلاع لیبیا کی مشرقی انتظامیہ نے دی ہے ۔ایسٹرن سیکیورٹی ڈائریکٹوریٹ نے ایک بیان میں کہا کہ یہ گرفتاریاں مصر اور لیبیا کی سرحد کے قریب واقع امسا کے قریب تحقیقات کے بعد کی گئیں، جس میں تارکین وطن کے زیر استعمال متعدد ٹھکانوں کا انکشاف ہوا۔بیان میں کہا گیا کہ آپریشن کے دوران تقریباً 570 تارکین وطن اور انسانی اسمگلنگ کے شبہ میں متعدد افراد کو حراست میں لیا گیا۔لیبیا تارکین وطن کے لیے ایک اہم روانگی کا مقام بن چکا ہے ، جہاں زیادہ تر دیگر افریقی ممالک کے تارکین وطن شامل ہیں۔ وہ 2011 کی نیٹو کی حمایت یافتہ بغاوت کے بعد سمندری راستے سے یورپ جانے کی کوشش کر رہے ہیں، جس نے طویل عرصے تک حکمرانی کرنے والے معمر قذافی کو اقتدار سے ہٹا دیا اور شمالی افریقی ملک کو افراتفری کی حالت میں ڈال دیا۔
