ممبئی، 10 اکتوبر (یو این آئی) شیوسینا (ادھو ٹھاکرے ) کے راجیہ سبھا رکن سنجے راوت نے ایک بڑا دعویٰ کرتے ہوئے کہا کہ مرکز کی مودی حکومت کی الٹی گنتی شروع ہو چکی ہے اور اگلے 6 ماہ میں، یعنی مارچ ۔ اپریل تک یہ حکومت گر جائے گی۔مسٹر راوت نے میڈیا سے بات کرتے ہوئے کہا کہ ملک بھر میں عوام کا غصہ پھوٹ پڑا ہے ، جسے اب کوئی دبا نہیں سکتا۔ انہوں نے دہلی میں چیف الیکشن کمشنر گیانیش کمار اور ایس آئی آر کے خلاف انڈیا اتحاد کے رہنماؤں پر پولیس کارروائی، پونے میں ایم پی ایس سی طلبہ کے احتجاج کو کچلنے کی کوششوں اور اپوزیشن قائدین کی گرفتاریوں پر مرکزی حکومت پر تنقید کی۔ مسٹر راوت نے کہا کہ تاجروں کے ذریعے چلائی جا رہی یہ حکومت عوام سے خوف زدہ ہے اور اس نے خود کو اندر سے بند کر لیا ہے ۔احتجاجی نوجوانوں اور اپوزیشن قائدین کو مبینہ طور پر مچھر مکھی کہے جانے کا ذکر کرتے ہوئے انہوں نے بالی ووڈ فلم یشونت کا حوالہ دیا اور کہا کہ ایک مچھر پورے نظام کو بے بس کر دیتا ہے ۔انہوں نے الزام لگایا کہ مودی اور امت شاہ اسی جابرانہ پالیسی کو اپنا رہے ہیں، جس کا استعمال انگریزوں نے آزادی کے متوالوں کے خلاف کیا تھا۔ مسٹر راوت نے پولیس فورس سے بھی اپیل کی کہ وہ عوام اور آئین کی حفاظت کرے اور حکومت کے غیر قانونی احکام ماننے سے انکار کرے ۔مسٹر راوت نے پیش قیاسی کی کہ 6 ماہ میں ملک میں بڑی سیاسی تبدیلی آئے گی اور 1947 کی طرز پر تمام جماعتوں کو ملا کر ایک عبوری قومی حکومت تشکیل دی جائے گی۔ انہوں نے نوجوانوں اور اہل وطن سے جمہوریت اور آئین کو بچانے اس دوسری جنگ آزادی میں کھل کر حصہ لینے کی اپیل کی۔
