لکھنؤ، 30 اگست (یو این آئی) بہوجن سماج پارٹی (بی ایس پی) کی قومی صدر اور اتر پردیش کی سابق وزیر اعلیٰ مایاوتی 31 اگست کو لکھنؤ میں پارٹی کے سینئر عہدیداران اور تمام 75 ضلعی صدور کے ساتھ ایک اہم میٹنگ کریں گی۔اس میٹنگ میں آئندہ اسمبلی انتخابات کی تیاریوں اور تنظیم کو مضبوط بنانے سمیت کئی اہم امور پر تبادلہ خیال کیا جائے گا۔ بی ایس پی کی جانب سے جاری بیان کے مطابق مایاوتی پیر کے روز پارٹی کے 12 مال ایونیو میں واقع ریاستی دفتر میں صبح 11 بجے سے اجلاس کی صدارت کریں گی۔ اس میں ریاست کے تمام سینئر عہدیداران اور 75 اضلاع کے صدور شرکت کریں گے ۔میٹنگ کے دوران پارٹی تنظیم کو زمینی سطح پر مستحکم کرنے ، مالی مضبوطی فراہم کرنے اور تمام طبقات میں پارٹی کا ووٹ بینک بڑھانے کیلئے پچھلی میٹنگوں میں دی گئی ہدایات پر پیش رفت رپورٹ طلب کی جائے گی۔ اس کے ساتھ ہی آئندہ اسمبلی انتخابات کی تیاریوں اور پارٹی امیدواروں کے انتخاب کے عمل کا بھی تفصیلی جائزہ لیا جائے گا۔
بی ایس پی کی جانب سے جاری مراسلے میں کہا گیا ہے کہ اجلاس کے دوران آئندہ کے لائحہ عمل کیلئے ضروری رہنما خطوط بھی جاری کیے جائیں گے ۔ بی ایس پی نے حال ہی میں اتر پردیش، پنجاب اور اتراکھنڈ میں آئندہ انتخابات تنہا لڑنے کا اعلان کیا ہے ، اس تناظر میں تنظیمی قیادت کے ساتھ مایاوتی کی یہ میٹنگ انتخابی حکمت عملی کے لحاظ سے انتہائی اہم سمجھی جا رہی ہے
