طئے شدہ اجلاس کے دن فلائی اوور کی افتتاحی تقریب پر ناراضگی کا اظہار
حیدرآباد 19 اگست ( سیاست نیوز ) : مرکزی وزیر جی کشن ریڈی نے جی ایچ ایم سی کے عہدیداروں پر سخت برہمی کا اظہار کیا ۔ تین ماہ قبل فیصلہ کئے گئے دیشا میٹنگ میں عہدیداروں کے شرکت نہ کرنے پر تشویش کا اظہار کیا ۔ کشن ریڈی نے میٹنگ کے دن ہی فلائی اوور کی افتتاحی تقریب منعقد کرنے پر ناراضگی کا اظہار کیا ۔ انہوں نے کہا کہ ریاست میں ترقیاتی کاموں کی انجام دہی کیلئے مرکزی حکومت سنجیدہ ہے اور پوری طرح مدد کررہی ہے ۔ مگر تلنگانہ حکومت مرکز سے تعاون نہیں کررہی ہے جس کی وجہ سے ترقیاتی کام ٹھپ ہو کر رہ گئے ہیں ۔ روڈ انڈر برج کی تعمیر کیلئے محکمہ ریلوے نے رضا مندی کا اظہار کیا ہے ۔ مگر جی ایچ ایم سی کی جانب سے تعاون و اشتراک حاصل نہیں ہورہا ہے ۔ دو دن قبل فلائی اوور کے افتتاح کی تاریخ مقرر کی گئی اور تین ماہ قبل جس اجلاس کی تاریخ مقرر ہوئی تھی اس کو نظر انداز کردیا گیا ۔ مرکزی وزیر نے کہا کہ جی ایچ ایم سی کے عدم تعاون سے کئی ترقیاتی کام زیر التواء ہوگئے ہیں ۔ محکمہ ریلوے ترقیاتی کام تیزی سے انجام دینے تیار ہے مگر بلدیہ تعاون کرنے سنجیدہ نہیں ہے ۔ کشن ریڈی نے کلکٹر حیدرآباد کو مشورہ دیا کہ وہ جی ایچ ایم سی و ریلوے عہدیداروں سے تال میل پیدا کرکے زیر التواء کاموں کو جلد از جلد مکمل کرائے ۔ ن
