قاہرہ ۔ 6 اپریل ۔(سیاست ڈاٹ کام) دستاویزی فلمیں پیش کرنے والا چینل ’’ڈسکوری‘‘ 8 اپریل کو مصری فرعون کی قبر کشائی کے مناظر براہ راست نشر کریگا۔ مصری جریدے الیوم نے ’’رشیاڈوڈے‘‘ کے حوالے سے تفصیلات بتاتے ہوئے کہا کہ تاریخ میں پہلی مرتبہ فرعون کے مقبرے کے اسرار کی فلم بندی کرکے براہ راست نشر کی جائیگی۔ دستاویزی پروگرام 2 گھنٹے پر محیط ہو گا جسے ڈسکوری چینل پر براہ راست دیکھا جاسکے گا۔ ڈسکوری چینل کی نینسی ڈینلز نے بتایا کہ مصرکے صحراء میں ہزاروں برس سے مدفون تاریخ کو کھوجنے کی فکر میں ہیں۔ اس حوالے سے میں بہت زیادہ پرجوش ہو ں۔ یہ معلوم کرنے کیلئے کہ 3100برس سے صحراء میں مدفون فرعون کس حالت میں ہونگے اور وہاں سے کیا کچھ برآمد ہوگا۔ معروف مہم جو گوش گیٹس کا کہنا ہے کہ 3ہزار 100 برس قدیم فرعون کے مقبرے کو کھولنے جارہے ہیں جہاں ہمیں کافی مشکل راہوں سے گزرنا ہو گا۔ اس مقبرے میں 40 ممیز موجود ہیں جو قبل 3 ہزار قبل از مسیح کی ہیں۔ ہمیں نہیں معلوم کہ وہاں ہمیں کیا ملے گا تاہم اس بات کا اندازہ ہے کہ فروعون کے تابوت کا ڈھکن جو پتھر سے بنایا گیا ہے اٹھائیں گے تو اس میں انسانی باقیات ہو ں گی۔ ڈسکوری کے اس پروگرام کی عکس بندی کے موقع پر مصری محکمہ آثار قدیمہ کے سیکریٹری جنرل اور دیگر اعلی حکام بھی موجود ہونگے۔ لوگوں کو بڑی بے چینی سے 8 اپریل کا انتظار ہے جب وہ اس ایڈونچر کو دیکھ سکیں گے۔
